බොරු කොණ්ඩකින් සැරසී දෙතොල්වල ලිෆ්ස්ටික් තවරා ගැහැනියක සේ ඇඳුම් හැඳ අඩි උස සපත්තු පැලඳ මාධ්‍ය සාකච්ඡාවකට පැමිණි ෆ්‍රෑන්ක් මැලොනි කියා සිටියේ තමා ලිංග විපර්යාසයකට මුහුණ දෙමින් සිටින බවයි. එහෙයින් තමාට කෙලී යනුවෙන් අමතන ලෙස ෆ්‍රෑන්ක් මැලොනි ඉල්ලා සිටියේය.
ෆ්‍රෑන්ක් මැලොනි ඉකුත් වසරේ ඔක්තෝබරයේදී බොක්සිං කළමනාකරුවකු ලෙස කරමින් සිටි රැකියාවෙන් ඉවත් වූයේ ක්‍රීඩාව කෙරෙහි ඇති කැමැත්ත බිඳ වැටෙමින් පවතින බව කියමිනි.
කෙසේ වුවද හෙළිදරව් වූ කරුණු අනුව මේ වන විට වසරකට අධික කාලයක් තිස්සේ ෆ්‍රෑන්ක් මැලොනි ලිංග විපර්යාසයට මුහුණ දෙමින් සිටී. එදා මෙදාතුර ෆ්‍රෑන්ක් මැලොනි කෙමෙන් කෙලී බවට පත් වූවා පමණක් නොව නව ලිංගික වෙනස සමඟ ජීවත් වීමටද පුරුදු පුහුණු වෙමින් සිටී.
බ්‍රිතාන්‍ය ජාතික සෞඛ්‍ය සේවා මාර්ගෝපදේශයන්ට අනුව පුරුෂයකු ලිංග විපර්යාසයක් සඳහා නිවැරැදි කිරීමේ සැත්කම සිදුකිරීමට පළමුව කාන්තාවක වශයෙන් වසර දෙකක් දිවි ගෙවිය යුතු වේ.
මේ වන විට සංක්‍රාන්ති සමයේ පසුවන කෙලී රහසිගත හෝර්මෝන ප්‍රතිකාර ලබමින් පැය ගණන් පිරිමි සමේ වූ ලෝම ඉවත් කිරීමට ගතකොට ඇති අතර ගැහැනු කට හඬ පුහුණු කිරීමේ සැසිවලට මෙන්ම උපදේශාත්මක වැඩසටහන්වලටද සහභාගි වී තිබේ.
බොක්සිං කළමනාකරු ෆ්‍රෑන්ක් මැලොනි දෙවතාවක් විවාහ වී බිරියන් දෙදෙනාගෙන් දියණියන් තිදෙනකුද ලැබූවෙකි. එහෙත් දැන් කියා සිටින්නේ තමා නිවැරැදි සිරුරේ ඉපදී නොමැත බවයි. 'මා ස්ත්‍රියක බව මා හැම විටම අවබෝධ කරගෙන සිටියා' යැයි කෙලී කියයි.
'තවදුරටත් එම පීඩාව දරාගෙන සිටියොත් එය මා මරා දමන්න තිබුණා. කැමැති කෙනා වෙන්න, ස්ත්‍රියක සේ අඳින්න මට හැමදාම ඕනෙකම තිබුණා. හිතලා බලලා මේ තීරණය ගත්තේ නැතිනම් මට ස්ත්‍රියක ලෙස අඳින්න වෙන්නෙ නැහැ. නමුත් ඒක මට ඉතා දැඩි ඕන කමක් වුණා.'
මේ පීඩනය තවදුරටත් දරා සිටිය නොහැකි වූ දිනෙක ෆ්‍රෑන්ක් මැලොනි සිය බිරිය ඉදිරිපිට ඇත්ත ප්‍රකාශ කෙළේ ඉන් විය හැකි පල විපාක නොදැන නොවේ. ෆ්‍රෑන්ක් මැලොනි 47 හැවිරිදි වියේ සිටි ඔහුගේ දෙවැනි බිරිය ට්‍රේසි අමතා 'මං ඔයාට යමක් කිව යුතුයි. මේ ජීවිතේ මා හැමදාම ගෙව්වේ බොරුවක්. ඇත්තටම මගේ හිතෙන් මං ගැහැනියක්' යැයි කීවේය. බිරියගේ මුහුණ වෙනස් වූ ආකාරයෙන්ම විවාහය එතැනින්ම නිමා වූ බව දැනගත් මැලොනි උඩ තට්ටුවේ පිහිටි කාමරයට ගියේ හඬා ගෙනය.
තමා බිරිය සමඟ වූ සබඳතාව නිමා කිරීමට අකැමැති වුවද එය ස්ත්‍රියක ලෙස ගෙවන නව දිවිය සඳහා තැබිය යුතු වූ හා අත්‍යවශ්‍යම මුල් පියවර වූ බව ඔහු කියයි.
(mawbima)
