ජවිපෙත් දෙමළ සන්ධානයත් රාජපක්ෂ කඳවුරේ ජයග්‍රහණය අපේක්ෂා නොකරන නිසාත් කරූ ජයසූරිය නිර්පාක්ෂික "ජාතික අපේක්ෂකයා' ලෙස ඉදිරිපත් වීමට එකඟ නිසාත් සියලු දෙනාගේ සහය ලබා ගැනීමට හැකි බව ඔහු පෙන්වා දී ඇත. එසේම කරූ ජයසූරියට ද ජවිපෙ සහ දෙමළ සන්ධානයේ සහය රැගෙන දිය හැකි බව මීට පෙර රාජිත සේනාරත්න පොරොන්දූ වී තිබු බවත් ඒ මහතාට සමීප ආරංචි මාර්ග පවසයි.කරූ ජයසූරිය ජනාධිපතිවරණ අපේක්ෂකත්වය වෙනුවෙන් ඉදිරිපත් වීමට තීරණය කර ඇත්තේද රාජිත ලබා දුන් පොරොන්දුව අනුවය.
එහෙත් දෙමල සන්ධානය දිගින් දිගටම ප්‍රකාශ කරමින් සිටින්නේ එජාපය විසින් සිය අපේක්ෂකයා නම් කිරීමෙන් පසුව තමන්ගේ සහය සම්බන්ධයෙන් ප්‍රකාශයක් සිදු කරන බවය.
රාජිත, ජවිපෙ සහය රැගෙන දීමට පොරොන්දු වූයේ ජවිපෙ ඊට එකඟව සිටින නිසාද යන්න ගැන තොරතුරු නැති මුත් පසුගියදා ජවිපෙ කේ. ඩී. ලාල්කාන්ත , විජිත හේරත්, ටිල්වින් සිල්වා ආදීන් දැඩිව අදහස් පළ කර තිබුනේ ජවිපෙ අපේක්ෂකයා ලෙස අනුර කුමාර දිසානායක් ඉදිරිපත් වීම නියත වශයෙන්ම සිදුවනු ඇති බවත් වෙනත් පක්ෂවලට මුක්කු නොගසන බවත්ය. එහෙත් ජවිපෙ නායක අනුර කුමාර දිසානායක තවමත් මේ සම්බන්ධයෙන් නිශ්චිත අදහසක් දක්වා නැත.
ඒ කෙසේ නමුත් ජනතා විමුක්ති පෙරමුණේ 1988/89 අරගල සමයේදී එය මර්දනය කිරීම සඳහා ඊට එරෙහිව ආයුධ සන්නද්ධ මිනිමරු කණ්ඩායමක් වන 'ප්‍රා' සංවිධානය නිර්මාණය කිරීමෙහි පුරෝගාමී වුයේ රාජිත සේනාරත්නය. ප්‍රා සංවිධානය මඟින් එවකට ජවිපෙට සම්බන්ධ විශාල පිරිසක් ඝාතනය කරන ලදී. එවකට ප්‍රා සංවිධානය කුලී මිනීමරුවන්ද ඝාතන සඳහා යෙදවූ අතර ජවිපෙ සාමාජිකයකුගේ ඔළුවකට රු 50,000 ගන්නේ ගෙවීමටද කටයුතු කර තිබිණි. ප්‍රා සංවිධානයේ මුලස්ථානය සහ ආයුධ ගබඩාව ලෙස පවත්වගෙන ගියේ රාජිත සේනාරත්නට අයත් කොළඹ නොරිස් චැනල් පාරේ පිහිටි නිවසය. එසේම රාජිත සේනාරත්න එවකට නියොජනය කළ පැරණි වාමාංශික පාර්ශ්වයේ කිහිප දෙනෙකුද ජවිපෙ සන්නද්ධ කණ්ඩායම් විසින් ඝාතනය කිරීම සිදු විය.
එකිනෙකා ඝාතනය කර ගනිමින් දේශපාලනයෙහි යෙදුනු මේ දෙපාර්ශ්වයට මිතුරු එකඟතාවයකට පැමිණ එජාපයේ අපේක්ෂකයකු වෙනුවෙන් පෙනී සිටින්නට හැකි වන්නෙ නම් එය මෙරට දේශපාලනයේ තවත් උත්ප්‍රාසජනක අවස්ථාවක් වෙනු ඇත.
