ඒෂියා සිකියුරිටීස් (Asia Securities) හි 4 වන වාර්ෂික ආයෝජන සමුළුව සැමරීම සඳහා පැවති අතථ්‍ය (virtual) සංසදයකදී ඔහු මේ බව පැවසීය.
වත්මන් පාලනය විසින් ක්‍රියාත්මක ආර්ථික ප්‍රතිපත්ති යටතේ නිවැරදී ආයෝජන වටපිටාවක් සකස් කිරීමෙහි ප්‍රතිපළයක් ලෙස ආයෝජකයන් වැඩි වශයෙන් මෙරටට ආකර්ෂණය වනු ඇති බවයි රජයේ විශ්වාසය වී තිබේන්නේ.
මේ වන විටත් සෘජු විදේශ ආයෝජන (FDI) ලෙස ලබන වසරේදී කොළඹ වරාය නගර සංවර්ධනය වෙනුවෙන් ඩොලර් බිලියන 1ක ආයෝජනයක් සිදුවීමට නියමිත බව තහවුරුව තිබේ. ඊට අමතරව හම්බන්තොට ටයර් කර්මාන්ත ශාලාව වෙනුවෙන් ඩොලර් මිලියන 300 ක් සහ ඖෂධ සහ අධ්‍යාපන ක්ෂේත්‍රය වෙනුවෙන් ඩොලර් මිලියන 200 ක පමණ ආයෝජන සිදු වීමට නියමිතය.
රටක සංවර්ධනයේදී විදේශීය සෘජු ආයෝජන ලැබීම අතිශය වැදගත්ය. එය සෑම ආණ්ඩුවක් විසින්ම සෑම කල්හීම බලාපොරොත්තු වූවකි.
එහෙත් මෑත කාලයෙහි වාර්ෂිකව ඩොලර් බිලියනය ඉක්මවා යෑමක් සිදු වූයේ කලාතුරකිනි. ආයෝජකයන්ගේ විශ්වාසය තහවුරු කිරීමට එම ආණ්ඩු පාලනයන් අසමත් වීම නිසා බොහෝ ආයෝජකයන් ආපසු හැරී ගියේය.
එහෙත් වත්මන් ආණ්ඩුවේ නිවැරදි ආර්ථික ප්‍රතිපත්තීන් මත එම තත්වයන් වෙනස් වනු ඇති බව අජිත් නිවාඩ් කබ්රාල් මහතා පෙන්වා දෙයි.
ඔහු පවසා සිටින්නේ හොඳින් පවත්වා ගෙන යන හිතකර පොලී අනුපාත, ස්ථාවර විනිමය අනුපාතය සහ ආයෝජන ව්‍යාපෘති ප්‍රවාහයක් වර්ධනයට හැකි වන පරිදි එකිනෙකට සම්බන්ධ වීමත්, ස්ථාවර පුරෝකථනය කළ හැකි සාර්ව තත්වයන් සමූහයක් දුටු විට ආයෝජකයින් ශ්‍රී ලංකාවේ ආයෝජනය කිරීමට උනන්දු වනු ඇති බවත්ය.
එසේම රජයේ මූලික පරමාර්ථය වනුයේ ව්‍යාපාරවලට ධනය නිර්මාණය කිරීමට උපකාර කිරීම සහ නිසි ප්‍රතිපත්ති තුළින් සියලු ආදායම් වර්ගවල සිටින ජනතාවට සමෘද්ධිය ඇති කිරීම සඳහා සාධාරණ හා සමානව ධනය බෙදා හැරීම රජය විසින් සහතික කරනු ඇති බවත්ය.