කොවිඩ් -19 අර්බුදය හමුවේ සිනමා කර්මාන්තය ඉතා අවදානම් තත්ත්වයකට පත්ව ඇතැයි චිත්‍රපට අධ්‍යක්ෂවරුන්, නිෂ්පාදකවරුන් සහ සිනමාශාලා හිමියන් මෙම හමුවේදී අගමැතිවරයා හට පැහැදිලි කර තිබේනවා.

එහි දී ඔවුන් 2021-2023 කාලය තුළ ආකර්ෂණීය චිත්‍රපට 25ක් ප්‍රදර්ශනය කිරීම ඇතුළු මෙම අභියෝගාත්මක කාලයේ දේශීය සිනමා කර්මාන්තය නඟා සිටුවීමට අදාළ ප්‍රායෝගික වැඩපිළිවෙළක් සහ සිනමාශාලාවල වර්තමාන තත්ත්වය පිළිබඳ තොරතුරු ද අගමැතිවරයා වෙත ඉදිරිපත් කර තිබේ.

සිනමාශාලාවල විදුලිය ගාස්තු ගණනය කිරීමේ දී කර්මාන්ත ගණයට ගෙන ගණනය කිරීම, විනෝද බද්ද වසර දෙකක කාලයක් සඳහා 05% දක්වා අඩුකිරීම, බෙදාහැරීමේ ගාස්තු අහෝසි කිරීම හෝ අවම කිරීම, මේ සම්බන්ධ තීන්දු ගැනීම විශේෂඥ කමිටුවක් යටතට පත්කිරීම, සිනමාපට නිෂ්පාදනය සඳහා 4 - 6%ක පොලී අනුපාතයට රාජ්‍ය බැංකුවලින් ණය ලබා දීම, රාජ්‍ය හා පෞද්ගලික මාධ්‍යවල සහනදායී ප්‍රචාරක වැඩපිළිවෙළක් සැකසීම ආදි කරුණු පිළිබඳ මෙම හමුවේ දී අගමැතිවරයාගේ අවධානය යොමු වී තිබේ.

කෙසේ වෙතත් මේ පිළිබඳ තීන්දු තීරණ ගැනීම සඳහා අදාළ යෝජනා ඒ ඒ ආයතන හා අංශ වෙත යොමු කර සාකච්ඡා කරන ලෙස එහිදී අගමැතිවරයා දැනුම් දදී තිබේ. ඒ අනුව අදාළ ආයතන හා අංශ දැනුම්වත් කරමින් ඉදිරියේ දී මෙම සහන ක්‍රියාත්මක කිරීම පිළිබඳ අවසන් තීන්දුවකට එළැඹීමට නියමිත බවයි අගමැති මාධ්‍ය අංශය පවසන්නේ.

සිනමා කර්මාන්තයෙහි නියැළි වෘත්තිකයන්ගේ සංගම් හා සංවිධාන ද චිත්‍රපට නිෂ්පාදන සංසදය, ශ්‍රී ලංකා සිනමා අධ්‍යක්ෂවරුන්ගේ සංසදය, දේශීය සිනමා ශිල්පීන්ගේ සන්ධානය හා සිනමාශාලා හිමියන්ගේ සංගමය මෙම හමුවට එක් වි තිබේ.

-පංචාලි අබේසේකර