එමෙන්ම විදේශයන්හි සිරවී සිටින අය ලෙස ලියාපදිංචි වී ඇති ශ්‍රී ලාංකිකයන් පමණක් දිනකට 750ක උපරිමයක් යටතේ මෙරටට රැගෙන ඒමයි සැලසුම . අනෙක් විදෙස්ගත ශ්‍රී ලාංකිකයන්ට මේ රටට පැමිණීම තවදුරටත් තාවකාලිකව අත්හිටුවා ඇත.

මීට අමතරව 21 වැනිදා සිට වෙනම මාර්ගෝපදේශ මාලාවක් යටතේ ව්‍යාපාරික අරමුණ වෙනුවෙන් මෙරටට පැමිණෙන්නන්ටද අවසර ලැබේ. තෝරාගත් හෝටල්වලින් පිටතට නොයන ජෛව බුබුළක් යටතේ ව්‍යාපාරික රැස්වීම් හා හමුවීම් පැවැත්වීමට ඔවුන්ට අනුමැතිය ලබාදීමට සංචාරක අමාත්‍යාංශය තීරණය කර තිබේ. එසේම පෞද්ගලික ජෙට් යානාවලින් මෙරටට පැමිණීමට අවසර ලත් පිරිසකට හැකියාව ලැබෙන අතර එම ජෙට්යානා ගොඩබෑම වෙනුවෙන් රත්මලාන ගුවන්තොටුපොළ භාවිත කිරීමටයි රජයේ සැලසුම.

මෙලෙස පැමිණෙන සියලු දෙනාට PCR පරීක්ෂණය අනිවාර්ය අතර , ජෛව ආරක්ෂණ බුබුළක් (Bio Security Bubble) යටතේ කොවිඩ් 19 කාර්ය සාධක බළකාය අනුමත කරන ලද හෝටල්වල සංචාරකයන්ට රැඳී සිටිය හැකිය.එසේම නිශ්චිත නිරෝධායන කාලසීමාවකින් අනතුරුව සංචාරක සංවර්ධන අධිකාරිය නිර්දේශ කරන ස්ථානවල පමණක් සංචාරය කළ හැකි බවයි වාර්තා වෙන්නේ.

-පංචාලි අබේසේකර