2012 වසර වන විට ස්වර්ණමහල් ආයතනය රුපියල් කෝටි 720ක මහජන තැන්පතු මුදල් භාරගෙන තිබෙන නමුත් මහ බැංකුවට හෙළි නොකළ තවත් ගිණුම් රැසක් සැකකරුවන් පවත්වාගෙන ගොස් ඇති හෙයින්, අදාළ මුදල කෝටි ගණනින් ඉහළ යා හැකි බවද නීතිපතිවරයා අධිකරණය වෙත දැනුම් දී තිබේ.
එම මුදල් ප්‍රමාණය නිශ්චිතව අනාවරණය කර ගැනීම සඳහා විගණනයක් සිදු කර ගැනීම සඳහා විගණනයක් සිදු කර අපරාධ පරීක්ෂණ දෙපාර්තමේන්තුව මගින් පුළුල් විමර්ශනයක් පවත්වන බවද නීතිපතිවරයා වෙනුවෙන් පෙනී සිටි ජ්‍යෙෂ්ඨ නියෝජ්‍ය සොලිසිටර් ජනරාල් හරිප්‍රියා ජයසුන්දර කොළඹ කොටුව මහෙස්ත්‍රාත් ප්‍රියන්ත ලියනගේ වෙත දැනුම් දුන්නාය.
මේ වන විට රිමාන්ඩ් භාරයට පත් කර සිටින ස්වර්ණමහල් ආයතනයේ හිටපු අධ්‍යක්ෂවරුන් වන ජීවක එදිරිසිංහ, නාලක එදිරිසිංහ, අසංක එදිරිසිංහ සහ දීපා එදිරිසිංහ යන අය මහජනයාගෙන් නීතිවිරෝධී ලෙස තැන්පතු මුදල් ලබාගෙන, එලෙස උපයන ලද කළු සල්ලි සැඟවූ ආකාරය හෙළිදරව් කරමින් ජ්‍යෙෂ්ඨ නියෝජ්‍ය සොලිසිටර් ජනරාල්වරිය අධිකරණය හමුවේදී දීර්ඝ කරුණු දැක්වීමක් කර තිබිණි.
අරුණ
