තානාපති කාර්යාල ප්‍රකාශකයෙක් සඳහන් කරන ලද්දේ ශ්‍රී ලංකාවෙන් අනුමැතිය ලද වහාම එම එන්නත් තොගය ශ්‍රී ලංකාවට ගුවන්ගත කරන බවයි.
‘‘මේ මස අවසානයට පෙර එන්නත් තොගය බීජිංහි ශ්‍රී ලංකා පාර්ශ්වයට (තානාපති කාර්යාලයට) භාර දෙනවා. ඒවා ශ්‍රී ලංකාවට යොමු කිරීම සඳහා ශ්‍රී ලංකා බලධාරීන්ගේ සහයෝගය අපේක්ෂාවෙනුයි අපි ඉන්නේ.’’ යැයි ප්‍රකාශකයා වැඩිදුරටත් සඳහන් කළේය.
මෙම එන්නත් තොගය පරිත්‍යාගයක් බැවින් ඒවා ලබාදීම සඳහා පුද්ගල කාණ්ඩ තෝරා ගන්නා ලෙස ඉල්ලා සිටීමේ බලයක් චීනයට නොමැති බවද ප්‍රකාශකයා පෙන්වා දුන්නේය. කෙසේ වෙතත් ශ්‍රී ලංකාවේ රැඳී සිටින චීන ජාතිකයන්ට මෙම එන්නත ලබා දීමට ශ්‍රී ලංකා රජය එකඟතාව පළ කර ඇතැයිද හෙතෙම වැඩිදුරටත් සඳහන් කළේය.
මේ අතර කොවිඩ් පාලන කටයුතු රාජ්‍ය ඇමැතිනි සුදර්ශනී ප්‍රනාන්දුපුල්ලේ පසුගිය සතියේ සඳහන් කරන ලද්දේ චීනයෙන් ආනයනය කරන සිනොෆාම් එන්නත ප්‍රථමයෙන් මෙරට වාසය කරන චීන ජාතිකයන්ට ලබා දීමට නියමිත බවයි. චීනයේ නිෂ්පාදිත මෙම එන්නත දැනට ලොව රටවල් 60 පුද්ගලයන් මිලියන 75කට ලබා දී ඇතැයි ද චීනය ප්‍රකාශ කරයි.
-අරුණ
