මෙම ප්‍රභේදයෙහි විශේෂත්වයක් ලෙස සැලකෙන්නේ ඉන්දියාවෙන් සොයාගත් B.1.617.2 සහ එක්සත් රාජධානියෙන් සොයාගත් B.1.1.7 යන ප්‍රභේද දෙකෙහිම ලක්‍ෂණ මේ තුළ දැකිය හැකි වීමයි. ඒ නිසා මෙය දෙමුහුන් ප්‍රභේදයක් ලෙසද හඳුන්වා තිබේ.
මෙම ප්‍රභේදය කලින් හඳුනාගෙත තිබූ ප්‍රභේදවලට වඩා වේගයෙන් වාතය හරහා පැතිරෙන ආකාරයක් දැකිය හැකි බවත් මෙය ඉතා භයානක ප්‍රභේදයක් බවත් වියට්නාම සෞඛ්‍ය අමාත්‍යවරයා ප්‍රකාශ කර ඇත.
පසුගිය සතිවල වියට්නාමය තුළ ආසාදිතයන් වාර්තා වීමෙහි ශීඝ්‍ර වැඩි වීමක් දැකිය හැකි වූ අතර මෙම නව වයිරස ප්‍රභේදයද ඊට බලපා ඇති ආකාරයක් පෙනේ. වසංගතය ආරම්භ වීමෙන් පසු මේ වනවිට එරටින් වාර්තා වී ඇති ආසාදිතයන් 6,700ක් අතරින් බාගයකට වැඩි සංඛ්‍යාවක් වාර්තා වී ඇත්තේ පසුගිය අප්‍රේල් මාසයෙන් පසුවය. ඉහත කී නව වයිරස ප්‍රභේදය ගැන සොයා ගැනීමට හැකි වී ඇත්තේ අලුත් ආසාදිතයන් සම්බන්ධයෙන් කරන ලද පරීක්‍ෂාවන්හිදී බව සඳහන් වේ. මෙම නව ප්‍රභේදයේ ජානවලට අදාල තොරතුරු ළඟදීම ප්‍රසිද්ධියට පත් කරන බව එරට සෞඛ්‍ය ඇමැතිවරයා තවදුරටත් සඳහන් කර තිබේ.
වසංගතයෙන් ලෝකයට එල්ල වන තර්ජනය තව දුරටත් අඛණ්ඩව ඉදිරියට යමින් ඇති බව මෙවැනි නව ප්‍රභේද නිසා තහවුරු වන බවත්, ඒ නිසා තව දුරටත් ආරක්‍ෂක විධි විධාන ගැන බැරෑරුම්ව සිතන්නට සිදුව ඇති බවත් මේ පිලිබඳව අදහස් දක්වමින් වසංගතවේදීන් මාධ්‍ය සමග පවසා තිබේ.
-පංචාලි අබේසේකර
