ඒ අනුව ඔහු ඩුබායිහි සිටින නඳුන් චින්තක හෙවත් හරක් කටා නැමැති මත්ද්‍රව්‍ය ජාවාරම්කරු බවයි නියෝජ්‍ය පොලිස්පති අජිත් රෝහණ සඳහන් කළේ.
සිද්ධිය සම්බන්ධයෙන් අත්අඩංගුවට ගෙන සිටි සැකකරුවන් 11 දෙනා ඊයේ (14) දිනයේ මාතර මහෙස්ත්‍රාත් අධිකරණයට ඉදිරිපත් කිරීමෙන් අනතුරුව දින 7ක කාලයක් රඳවා තබා ගනිමින් ප්‍රශ්න කිරීමට අවසර ලබාගෙන තිබේ.
මෙම සැකකරුවන් 11 දෙනාට අමතරව අදාළ සිද්ධියට සම්බන්ධ තවත් සැකකරුවන් දෙදෙනෙකු ඊයේ (14) රාත්‍රියේ දී කෝට්ටේගොඩ සහ දික්වැල්ල ප්‍රදේශවලදී අත්අඩංගුවට ගෙන තිබේ.
එම සැකකරුවන් දෙදෙනා මෙම මත්ද්‍රව්‍ය ජාවාරම සඳහා ආධාර හා අනුබල දුන් අය බවට හඳුනාගෙන ඇති බව පොලිස් මාධ්‍ය ප්‍රකාශක, නියෝජ්‍ය පොලිස්පති අජිත් රෝහණ මහතා සඳහන් කළේය.
මත්ද්‍රව්‍ය ප්‍රවාහනය කරමින් තිබූ ප්‍රධාන ධීවර බෝට්ටුවේ ධීවරයින් අතරට පුද්ගලයින් යෙදවීම සහ ඒ සඳහා මුදල් යෙදවීම ඔවුන්ට එල්ලවී ඇති චෝදනා වෙයි. එම පුද්ගලයින් දෙදෙනා සම්බන්ධයෙන් ද රඳවා තබා ගැනීමේ නියෝගයක් ලබා ගනිමින් ප්‍රශ්න කිරීමට නියමිතය.
ශ්‍රී ලංකා නාවික හමුදාව සහ වෙරළ ආරක්ෂක බළකාය විසින් මීට දින දෙකකට පෙර එම අත්අඩංගුවට ගැනීම සිදුකර තිබුණි. පසුව එම මත්ද්‍රව්‍ය සහ අත්අඩංගුවට ගැනුණු සැකකරුවන් 11 දෙනා පොලිස් මත්ද්‍රව්‍ය නාශක කාර්යාංශය වෙත භාරදීමට පියවර ගැනුණි.
-පංචාලි අබේසේකර
