ඒ අනුව මේ කැබිනට් පත්‍රිකාවේ අඩංගු කරුණු සම්බන්ධයෙන් අඟහරුවාදා පෙරවරු 11. 00ට ගුරු සංගම් නියෝජිතයන් නැවත වරක් ඇමැතිවරයා සමඟ සාකච්ඡාවක් පැවැත්වීමටත් නියමිතය. උසස් අධ්‍යාපන ඇමැතිවරයා මේ බව දැනුම් දී ඇත්තේ ගුරු සංගම් නියෝජිතයන් ජනාධිපති ලේකම් කාර්යාලයේ නිලධාරීන් සමඟ ඊයේ (22) පැවැත් වූ සාකච්ඡාවට දුරකතනයෙන් සම්බන්ධ වෙමිනි.
එමෙන්ම සිකුරාදා (30) දිනට පෙර ජනාධිපති ගෝඨාභය රාජපක්ෂ මහතා සමඟ ද සාකච්ඡාවක් පැවැත්වීමට අවස්ථාව ලැබී තිබෙන බව ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ මහතා දිනමිණට ඊයේ (22) පැවසීය.
මේ සාකච්ඡාවට අධ්‍යාපන ඇමැතිවරයා, මුදල් අමාත්‍යාංශයේ හා අධ්‍යාපන අමාත්‍යාංශයේ නිලධාරීන් සහ වැටුප් කොමිසමේ නිලධාරීන් සහභාගි වීමට නියමිත බවද කීය.
ගුරු සේවාව සංවෘත සේවාවක් බවට පත් කරමින් වැටුප් විෂමතා ඉවත් කිරීම ඇතුළු ඉල්ලීම් ඉදිරිපත් කරමින් 2020 වසරේ පෙබරවාරි 14 දා ජනාධිපති ලේකම් කාර්යාලය වෙත ගුරු හා විදුහල්පති සංගම් සන්දේශයක් භාර දී වසර එකහමාරක් ගත වුවද එයට පිළිතුරු ලිපියක් හෝ නොලැබුණු බවද, උද්ඝෝෂණ පෙළපාළියක් මඟින් ජනාධිපති ලේකම් කාර්යාලය දක්වා ගමන් කිරීමට ගුරුවරුන්ට ඊයේ (22) සිදු වූයේ ඒ නිසා බවද ලංකා ගුරු සේවා සංගමයේ ප්‍රධාන ලේකම්වරයා සඳහන් කළේය. කෙසේ වෙතත් තම ඉල්ලීම් ලැබෙන තෙක් ඔන්ලයින් වර්ජනය ක්‍රියාත්මක බවද හෙතෙම සඳහන් කළේය.
දිනමිණ
