ශ්‍රී ලංකා රේගු සංඛ්‍යා ලේඛනවලට අනුව මේ වසරේ (2021) ජූලි මාසයේ දී රුපියල් කෝටි 21,768.32ක (අමෙරිකානු ඩොලර් මිලියන 1,099.41) අපනයන ආදායමක් වාර්තා කර ඇති අතර එය එක් මාසයක් තුළ වැඩිම අපනයන ආදායම ලෙස ඉතිහාසයට එක් වන බව අපනයන සංවර්ධන මණ්ඩලය පෙන්වා දෙයි.

පසුගිය 2020 වසරේ ජූලි මාසයේ දී අපනයන ආදායම ඇමෙරිකානු ඩොලර් මිලියන 1,085ක් වූ බව පෙන්වා දෙන අපනයන සංවර්ධන මණ්ඩලය එම අගය ඉක්මවා යමින් මේ වසරේ ජූලි මාසයේ දී අපනයන ආදායම ඉහළ ගොස් ඇතැයි පවසයි.

මීට පෙර මේ වසරේ මාර්තු මාසයේ ශ්‍රී ලංකාව අවසන් වරට ඩොලර් මිලියන 1,000ක අපනයන සීමාව පසුකළ බව පෙන්වා දෙන එම මණ්ඩලය මේ අනුව 2021 මුල් මාස 07 තුළ ශ්‍රී ලංකාව ලබා ඇති මුළු අපනයන ආදායම රුපියල් කෝටි 131,890.37 (ඩොලර් මිලියන 6,661.13) කි. මෙය 2020 වසරේ මුල් මාස 07 අපනයන ආදායම වන රුපියල් කෝටි 107,960.09 (අමෙරිකානු ඩොලර් මිලියන 5,452.53) ට සාපේක්ෂව සියයට 22.17 ක ඉහළ යාමකි.

වැඩිම අපනයන ආදායම ඇඟලුම් අංශයෙන් ලැබී ඇති අතර එය අමෙරිකානු ඩොලර් මිලියන 452.55 ක් වේ. එසේම තේ අපනයනයෙන් අමෙරිකානු ඩොලර් මිලියන 115.13 ක ආදායමක් උපයාගෙන තිබෙන අතර රබර් ආශ්‍රිත නිෂ්පාදන අපනයනයෙන් ඇමෙරිකානු ඩොලර් මිලියන 96.65 ක් ද ලැබී ඇත. පොල් ආශ්‍රිත නිෂ්පාදන අපනයනයෙන් අමෙරිකානු ඩොලර් මිලියන 76.67 ක් වශයෙන් අපනයන ආදායම සඳහා ඉහළ දායකත්වයක් දුන් අංශ අතර වෙයි.

-දිවයින