කෙසේ වෙතත් පසුගිය වසරට සාපේක්ෂව මෙවර ලැබී ඇත්තේ අඩු අයැදුම්පත් සංඛ්‍යාවක් බවයි අධ්‍යාපන අමාත්‍යාංශය සදහන් කරන්නේ. වෘත්තීය ක්‍රියාමාර්ග හේතුවෙන් ඇතැම් ගුරුවරුන් හා විදුහල්පතිවරුන් දරුවන්ගේ විභාග අයැදුම්පත්‍ර යොමුකර නැති බවයි සදහන් වන්නේ.
ශ්‍රී ලංකා පොදුජන අධ්‍යාපන සේවා සංගමයේ අනුරාධපුර ශාඛාවේ නිලධාරීන් මාධ්‍ය හමුවක් කැදවමින් ප්‍රකාශ කළේ, තමන් දරුවන්ට අධ්‍යාපනය ලබාදෙන කටයුතු ආරම්භ කළද ඇතැම් වෘත්තිය සමිතිවලින් තර්ජන එල්ල වන බවයි.
ඔන්ලයින් ක්‍රමයට ගුරුවරුන් පිරිසක් දරුවන්ට අධ්‍යාපනය ලබා දුන්නද එවැනි ගුරුවරුන්ට තර්ජනය කිරීමේ හැකියාවක් තමන්ට පවතින බවයි ලංකා ගුරු සංගමය තවත් මාධ්‍ය හමුවක් පවත්වමින් ප්‍රකාශ කළේ.
ඔන්ලයින් ක්‍රමයට දරුවන්ට අධ්‍යාපනය ලබාදෙන ගුරුවරුන්ට එල්ල වන තර්ජන සම්බන්ධයෙන් මහජන ආරක්ෂාව පිළිබද අමාත්‍ය සරත් වීරසේකර මහතා දැනුවත් කිරීමට ගුරු විදුහල්පති සංගම් නියෝජිතයින් ක්‍රියා කළා. දරුවන්ගේ අධ්‍යාපනය කඩා කප්පල් කරන පුද්ගලයන් සම්බන්ධයෙන් නීතිය දැඩිව ක්‍රියාත්මක කිරීමට පොලිස්පතිවරයා දැනුවත් කරන බව අමාත්‍යවරයා මෙහිදි කියා සිටියා. මෙම සාකච්ඡාවට එක්වූ ගුරුවරුන් ප්‍රකාශ කළේ තමන් ඉදිරියටත් ඔන්ලයින් ක්‍රමයට දරුවන්ට අධ්‍යාපනය ලබාදීමට කැපවන බවයි.
මේ අතර වෘත්තිය සමිති නියෝජිතයන් හා අධ්‍යාපන අමාත්‍යාංශයේ ලේකම් මහාචාර්ය කපිල පෙරේරා මහතා අතර සාකච්ඡාවක් එම අමාත්‍යාංශයේදී පැවැත්වුණා.
-පංචාලි අබේසේකර
