මේ අතර සමගි ජන බලවේගයේ මන්ත්‍රීවරුන් කණ්ඩායම් පහකට බෙදී වෙන් වෙන්ව කටයුතු කිරීම නිසා පක්ෂය තුළ දේශපාලන අර්බුදයක් ඇතිව තිබෙන බව දේශපාලන ආරංචි මාර්ග සදහන් කරනවා.
මේ පිළිබද තොරතුරු ජාතික පුවත්පතක ද අද සදහන් වූ අතර වෙබ් අඩවි කීපයකම තොරතුරු පළව තිබුණා. එක්සත් ජාතික පක්ෂ නායක රනිල් වික්‍රමසිංහ මහතා සමග පක්ෂයේ මන්ත්‍රීවරුන් කීප දෙනෙකු සමීපව කටයුතු කරන බවත් සමගි ජන බලවේගයේ සුලු ජාතික පක්ෂවල නායකයින් සිය දේශපාලන පක්ෂවල කටයුතු වෙන වෙනම සිදුකරන බවත් දේශපාලන ආරංචිමාර්ග සදහන් කරනවා.
බදුල්ල දිස්ත්‍රික් නායකත්වය සම්බන්ධයෙන් චමින්ද විජේසිරි සහ රවීන්ද්‍ර සමරවීර යන පාර්ලිමේන්තු මන්ත්‍රීවරුන් අතරත් රත්නපුර දිස්ත්‍රික් නායකත්වය පිළිබද තලතා අතුකෝරල සහ හේෂා විතානගේ මන්ත්‍රීවරුන් අතරත් ගැටලුකාරී තත්ත්වයක් ඇතිව තිබෙන බව වාර්තා වනවා. පාර්ලිමේන්තු මන්ත්‍රී පාඨලී චම්පික රණවක මහතා තවත් මන්ත්‍රීවරුන් කීප දෙනෙකු සමග වෙනම කටයුතු කරන බවත් දේශපාලන ආරංචි මාර්ග තවදුරටත් සදහන් කරනවා. මේ අතර තවත් තරුණ මන්ත්‍රීවරුන් පිරිසක් ආණ්ඩුවට එක්වීමේ සූදානමක් ඇති බවද දේශපාලන ආරංචි මාර්ග සදහන් කරනවා.
-ITN
