බන්ධනාගාර රැඳවියන්ගේ හා සිරකරුවන්ගේ ආරක්ෂාව ,නීතිවිරෝධී ද්‍රව්‍ය හුවමාරුව නතරකිරිම මෙන්ම වසංගත තත්ත්ව පාලනය පහසු කරලීම මෙහි අපේක්ෂාවයි. බන්ධනාගාර තුළ ඇති අධික තදබදයත් සිරකරුවන් අධිකරණ කටයුතු සදහා බැහැරයාමත් නිසා වසංගත තත්ත්ව පාලනයට බාදාවක් වි තිබේ.
එමෙන්ම සිරකරුවන් උසාවි වෙත ගෙනයාමේදී පැනයාමට උත්සාහ දැරීම මෙන්ම ඔවුන් ඝාතනවලට ඉලක්ක වීමත් සිරකරුවන් බැලීමට එන අමුතන් මගින් නීතිවිරෝධී ද්‍රව්‍ය බන්ධනාගාර තුළට ඇතුළු වීමත් බරපතල ගැටළුවක් බව බන්ධනාගාර දෙපාර්තමේන්තුව පවසයි. වීඩියෝ සම්මන්ත්‍රණ තාක්ෂණය තුළින් ගරු විනිශ්චයකාරවරුන්ට සිරකරුවන්ගේ තත්වය පරික්ෂා කිරීමට හැකිවන අතර අධිකරණ වෙත රැගෙන යාම පාලනය වේ. එමෙන්ම අමුත්තන් මුණ ගැසීමට හා නීතිඥ උපදෙස් ලබාගැනීමට මෙම තාක්ෂණය මගින්ම හැකිවීමෙන් බාහිර පාර්ශ්ව බන්ධනාගාර වෙත පැමිණීමද පාලනය වේ.
බස්නාහිර පළාත් අධිකරණ 10 බන්ධනාගාර 4 ක මෙම පහසුකම් පළමු පියවර ලෙස සැපයේ. තොරතුරු හා සන්නිවේදන තාක්ෂණ නියෝජිතායතනය මේ සඳහා තාක්ෂණ පහසුකම් හා උපදෙශ් ලබාදෙන අතර අමාත්‍යංශය හා බන්ධනාගාර දෙපාර්තමේන්තුව වැඩසටහන ක්‍රියාවට නගනු ලබයි.
මෙම වැඩපිළිවල ක්‍රියාත්මක කිරීම සදහා වූ අවබෝධතා ගිවිසුම අත්සන් කිරීම අධිකරණ අමාත්‍යංශය, බන්ධාගාර දෙපාර්තමේන්තුව හා ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය අතර අමාත්‍යංශ ශ්‍රවනාගාරයේදී සිදු කෙරිණ.
වසංගත අර්බුධයක් සමග සටන් කිරීමට සිදුව ඇති කාලයක් තුළ මේ සම්බන්ධයෙන් අවධානය යොමු කරමින් එයට පිළියම් යෙදීම වැදගත් කාලෝචිත ක්‍රියාවකි. මෙරට බන්ධනාගාර තුළ විශාල අර්බුධ ගණනාවක් පවතින අතර නීතිවිරෝධී ද්‍රව්‍ය හුවමාරුවද එහි ප්‍රධාන ප්‍රශ්නයක් දක්වා ඔඩුදුවා ඇත. එහෙත් මෙවැනි නව තාක්ෂනය උපයෝගී කර ගැනීම තුළින් එම අර්බුධයන් බොහෝ දුරට වළක්වාලිය හැකිය..එමෙන්ම සිරකරුවන්ගේ ආරක්ෂාව මෙන්ම එමගින් මුළුමහත් සමාජයම ආරක්ෂා වනු ඇත.
-පංචාලි
