ආසියා පැසිෆික් කලාපීය ලෝක සාගර සමුළුවේ ප්‍රධාන දේශනය ඔන්ලයින් තාක්ෂණය ඔස්සේ පවත්වමින් අග්‍රාමාත්‍යවරයා මේ බව ප්‍රකාශ කළා.
මෙම සමුළුව ලබන 10 වනදා දක්වා පැවැත්වෙනවා. ලොව පුරා රටවල් නියෝජනය කරමින් දෙදහසකට අධික පිරිසක් ඊට එක්වන අතර දේශන සියයක් මේ යටතේ පැවැත්වෙනවා. නීලමූල්‍ය යාන්ත්‍රණයන් සහ ප්‍රධාන ධාරාවේ මූල්‍ය මගින් තිරසර නිල් ආර්ථිකයකට වඩා හොදින් සහාය විය හැකි ආකාරය විමසා බැලීම මෙහි ප්‍රධාන අරමුණක් බවට පත්ව තිබෙනවා. ඉන්දියන් සාගරයෙන් වටවූ දුපත් රාජ්‍යයක් ලෙස සාගරයට ගෞරව කිරීමටත් ඉන්දියන් සාගරය ආරක්ෂා කිරීමටත් විශාල වගකීමක් ශ්‍රී ලංකාවට පැවරී ඇති බව අග්‍රාමාත්‍යවරයා මෙහිදී වැඩිදුරටත් අවධාරණය කළා. අන්තර්ජාතික සාගර කලාපය සංරක්ෂණය කිරීමේදී සංවර්ධිත රටවල් සංවර්ධනය වෙමින් පවතින රටවල් සමඟ සහයෝගයෙන් කටයුතු කළ යුතු බව තමන් විශ්වාස කරන බවද අග්‍රාමාත්‍ය මහින්ද රාජපක්ෂ මහතා මෙහිදී පැවසුවා. නීල හරිත ආර්ථික සංකල්පය යටතේ සාගර සම්පත් තිරසර ලෙස ප්‍ර යෝජනයට ගැනීම ශ්‍රී ලංකා රජයේ ජාතික ප්‍රතිපත්තිය බවද සමුළුව අමතමින් අග්‍රාමාත්‍යවරයා කියා සිටියා.
-පංචාලි අබේසේකර
