මෙම වැඩ පිළිවෙළ යටතේ පරිසර අමාත්‍යාංශය විසින් 2022 වසර තුළ හෙක්ටෙයාර් 500ක රබර් වගා කිරීමට නියමිතය. ඒ අනුව පළමු අදියර සඳහා මේ වනවිට වෙන් කර ඇති මුදල රුපියල් මිලියන 100කි.

අප රටේ මේ වනවිට වගා කර ඇති රබර් ප්‍රමාණය හෙක්ටෙයාර් 1,36,000ක් පමණ වේ. නමුත් මෙම බිම් ප්‍රමාණය මෙතෙක් වනවැස්මට අයත් සේ සළකා නැත. ශ්‍රී ලංකාවේ ස්වාභාවික වනවැස්ම 2025 වනවිට සියයට 30ක් දක්වා ඉහළ නැංවීම ජනාධිපති ගෝඨාභය රාජපක්ෂ මහතාගේ සෞභාග්‍යයේ දැක්ම ප්‍රතිපත්ති ප්‍රකාශනයේ අන්තර්ගත කර තිබේ.

ඒ අනුව මේ වනවිට සියයට 29.2ක් වන ශ්‍රී ලංකාවේ ස්වාභාවික වන වැස්ම සියයට 30 දක්වා ඉහළ දැමීමට නම් තවත් දශම 08කින් එය ඉහළ නැංවිය යුතුය. ඒ සඳහා වගා කළ යුතු ඉඩම් ප්‍රමාණය හෙක්ටෙයාර් 65,000ක් යැයි මේ වන විටත් බලධාරීන් ගණන් බලා තිබේ. ලෝකයේ බොහෝ රටවල වන වැස්ම සඳහා එම රටවල රබර් වගාව ද ඇතුළත් කර ඇතත් මේ වන තෙක් අපේ රටේ රබර් වගාව වන වැස්මට අදාළ කර ගණන් ගැනීමක් සිදු කර නොමැත. එම නිසා පරිසර අමාත්‍යංශය විසින් ගනු ලැබූ මෙම තීරණය සුබවාදී තීරණයක් බව කිව යුතුය.

-පංචාලි