මෙරට තේ කර්මාන්තය කාලගුණ වෙනස මෙන්ම රසායනික පොහොර හිඟයට මුහුණ දෙමින් මෙම වර්ධනය වාර්තා කිරීම විශේෂත්වයකි. පොහොර ගැටළුව හේතුවෙන් විපක්ෂ මතධාරීන් දිගින් දිගටම කියා සිටියේ මෙරට තේ කර්මාන්තය මුළුමනින්ම පාහේ විනාශ වී යනු ඇති බවය. ආණ්ඩුවේ වැරදි ප්‍රතිපත්ති නිසා මෙරට කෘෂි කර්මාන්තය විනාශ වී අපනයන වගාවන්ගෙන් ලැබෙන විදේශ විනිමය හිඟවීම සහ මෙරට මහා ආහාර හිඟයක් සිදුවන බවත් කියමින් සිටියද ඒ මේ වන විට පුස්සක් බවට පත්ව තිබේ.

2021 වසරේ දී මෙරට තේ නිෂ්පාදනය 2020 වසරට සාපේක්ෂව 7.35%කින් ඉහළ ගිය අතර, වසරේ මුල් නිෂ්පාදනය කිලෝග්‍රෑම් මිලියන 299.34කි.

කෙසේ නමුත් එය, 2019 වසරේ වාර්තා වූ කිලෝග්‍රෑම් මිලියන 300.12ක නිෂ්පාදනයට සාපේක්ෂව නාමික පහත වැටීමක් ලෙස සැළකිය හැකිය. 2021 වසරේ දී ශ්‍රී ලංකාව තේ කිලෝග්‍රෑම් මිලියන 286.02ක් අපනයනය කළ අතර, එය, 2020ට සාපේක්ෂව කිලෝග්‍රෑම් මිලියන 20.4ක ඉහළ යෑමකි.

එමෙන්ම 2021 වසරේ දී ශ්‍රී ලංකාව තේ අපනයනයෙන් රුපියල් බිලියන 263.35ක ආදායමක් උපයා ඇත්තේ 2020 වසරට වඩා රුපියල් බිලියන 33.18ක් උපයමිනි.

එමෙන්ම එය, ශ්‍රී ලංකාව මෙතෙක් වසරක දී තේ අපනයනයෙන් වැඩිම ආදායම, එනම් රුපියල් බිලියන 240.6ක් වාර්තා කළ 2019 වසරේ ආදායම් වාර්තාවද අභිබවවා ගොස් ඇත.