බැසිල් රාජපක්ෂ නිසා නොව ජනාධිපතිවරයා පත්කිරීම, ආණ්ඩු පක්ෂයේම අමාත්යවරයෙකු ගෙනෙන ව්යවස්ථා සංශෝධනයක් වීම ඇතුළු කරුණු ගණනාවක් මත විසි එක් වැනි සංශෝධනය පිළිබඳ දැඩි මතයකට ඒමට පොදුජන පෙරමුණට නොහැකි වූ බවත් ඒ නිසා පොදු ජන පෙරමුණේ මන්ත්රීවරුන්ට තම තමන්ගේ හෘදය සාක්ෂිය මත 21 සංශෝධනය ගැන තීරණ ගැනීමට නිදහස දී තිබුණු බවත් පොදුජන පෙරමුණේ ලේකම් නීතිඥ සාගර කාරියවසම් නෙක්ස්ටීවී මාධ්ය ආයතනයට පවසා ඇත.
රටේ මූලික නීතිය පිළිබඳ මෙවැනි වැදගත් සංශෝධනයකදී පක්ෂයකට ස්ථිර මතයක් නොමැති වීම දේශපාලනිකව අර්බුදයකට යාමක් නොවේදැයි කළ විමසුමට පිළිතුරු දුන් කාරියවසම් මහතා කීවේ දේශපාලන න්යායානුකූලව එය වැරදි යැයි තමන් පිළිගන්නා බවය.
පොහොට්ටුවේ සිටි ඇතැමුන් 17 ,18, 19 ,20 වැනි ව්යවස්ථා සංශෝධනවලදී දී ඡන්දය දුන් ආකාරය ඉතාම බඩගෝස්තරවාදී යැයි ද ප්රකාශ කළ ඒ මහතා ඔවුන් සමඟ දේශපාලනය කිරීම ගැන සිතා බැලිය යුතුව ඇතැයි ද කීවේය.
මේ ප්රශ්න මත පක්ෂය දෙකට තුනට වෙන්ව තිබීම ගැන කළ විමසීමට පිළිතුරු දුන් කාරියවසම් මහතා පක්ෂය එකමුතුව ඉන්නවා යැයි බොරු කීමට අවශ්ය නැති බවත් පොදුජන පෙරමුණ මේ වන විට කොටස් කිහිපයකට වෙන්වී ඇති බවත් කීවේය. තම අභිප්රාය පක්ෂයේ ප්රමුඛ ප්රතිපත්තිය වන ජාතික ආර්ථිකයක් ගොඩනැංවීම යන තේමාව යටතේ එකට එකතු විය හැකි සුළු හෝ පිරිසක් සමග පක්ෂය යළි ගොඩනැගීම බවද ප්රකාශ කළ ඒ මහතා එහි නව නායකත්වය අනාගතයේ තීරණය වනු ඇති බවද කීවේය.
