ඒ අනුව මේ සම්බන්ධ විශේෂ සාකච්ඡාවන් සඳුදා (9) පැවැත්වෙන අතර, ඒ සඳහා පේරාදෙණිය උද්භිද උද්යානයේ විශේෂඥයන්, වන සංරක්ෂණ ජනරාල් ඇතුළු ගස් වර්ග පිළිබඳ විශේෂඥයන්ගෙන් සමන්විත පිරිසක් එක් වන බව ඒ මහත්මිය ප්රකාශ කළා.
කොල්ලුපිටිය ලිබර්ටි වටරවුම ආසන්නයේ ඩුප්ලිකේෂන් මාර්ගයේදී පස් දෙනකුට මරු කැඳවමින් ඊයේ (6) සිදු වූ අවාසනාවන්ත අනතුරත් සමඟ කොළඹ නගරයේ එවැනි අනතුරුදායක ගස් ඉවත් කිරීමට අවධානය යොමු වී ඇති බවත්, මේ සාකච්ඡාව ඒ සඳහා එක් පියවරක් බවත් පැවසූ නාගරික කොමසාරිස්වරිය ඒ ගස් කපා ඉවත් කිරීමට ගුවන් හමුදාවේ සහාය ගැනීමට අවධානය යොමුව ඇති බව සඳහන් කළාය. ඊයේ දිනයේම වනජීවී වනසම්පත් සංරක්ෂණ අමාත්යාංශයේ ලේකම්වරිය සමඟද සාකච්ඡාවක් සිදු කළ බවත්, එහිදී අනතුරුදායක ගස් සම්බන්ධයෙන් වාර්තාවක් දෙන ලෙස තමා ඉල්ලීමක් සිදු කළ බවත් ඇය කීවාය.
කොල්ලුපිටිය ලිබර්ටි වටරවුම ආසන්නයේ ඩුප්ලිකේෂන් මාර්ගයේදී ශ්රී ලංකා ගමනාගමන මණ්ඩලයට අයත් බස් රථයක් මතට ඉදිරී වැටුණු පැරණි නුග ගස මීට මාස දෙකකට පෙර අතු කපාදැමූ ගසක් බවත්, මෙවැනි අනතුරුදායක ගස් කපාදැමීමත් මෙවැනි ගස් පාලනය කිරීම කොළඹ මහා නගර සභාව විසින් සිදු කරන බවත් පැවසූ නාගරික කොමසාරිස්වරිය ඒ සඳහා පැය 24 පුරා කටයුතු කරන ඒකකයක් ස්ථාපිත කර ඇති බවත් සදහන් කර ඇත.
