තානාපතිනිය පෙන්වා දෙන්නේ මෙම පියවර ශ්‍රී ලංකාව සඳහා තීරණාත්මක පියවරක් බවත් එය රටේ ප්‍රගතිය සඳහා පමණක් නොව, තිරසර ප්‍රතිසංස්කරණ සහ වැඩිදියුණු කළ පාලනයේ අඛණ්ඩ වැදගත්කම අවධාරණය කරන්නක් බවත්ය. කෙසේ වුවද වඩාත් අවදානමට ලක්විය හැකි පුද්ගලයන් ආරක්ෂා කිරීමේ වැදගත්කම ද පෙන්වා දෙන ජුලී චැන්ග් මහත්මිය ආර්ථික ස්ථාවරත්වය සහ සමෘද්ධිය සඳහා ශ්‍රී ලංකාවේ ගමන් මඟට එක්සත් ජනපදයේ අඛණ්ඩ සහාය හිමිවන බවද කියා සිටී. ජාත්‍යන්තර මූල්‍ය අරමුදලේ විධායක මණ්ඩලය විසින් මාස 48ක විස්තීර්ණ ණය පහසුකම් වැඩසටහනේ පළමු සමාලෝචනය පසුගිය 12 දින සම්පූර්ණ කරන ලද අතර, ඒ අනුව දෙවැනි ණය වාරිකය වන අමෙරිකානු ඩොලර් මිලියන 337 ක මුදලක් ශ්‍රී ලංකාවට මුදාහැරීමට එම අරමුදල තීරණය කර තිබේ.
මෙම වැඩසටහන යටතේ ශ්‍රී ලංකාවේ කාර්ය සාධනය සතුටුදායක මට්ටමක පැවතීම හේතුවෙන් ජාත්‍යන්තර මූල්‍ය අරමුදලේ විධායක මණ්ඩලය මෙම තීරණය ගෙන තිබෙන බවද එක් කාර්ය සාධන නිර්ණායකයක් හැර අනෙකුත් සියලුම දර්ශක ඉලක්ක පසුගිය ජුනි මාසයේ අවසානය වන විට සපුරා තිබෙන බවද ජාත්‍යන්තර මූල්‍ය අරමුදල කියා සිටී.
-P.M
