දුර බැහැල පළාත්වලින් ප්‍රශ්න පත්‍ර ඇගයීම් කටයුතු වෙනුවෙන් පැමිණි ගුරුවරුන්ට නවාතැන් පහසුකම් ඇතුළු සෙසු පහසුකම් සපයා නොදීම හේතුවෙන් ඔවුන් ඊයේ (19) රාත්‍රිය වනතුරු නවාතැන් ස්ථාන සොයා ගැනීමට පවා නොහැකිව බොහෝ අපහසුතාවයට පත්වූ බව වාර්තා වේ.
එහිදී ප්‍රතිඵල සමීක්ෂණය සදහා පැමිණි ගුරුවරයෙකු මෙසේද පැවසීය.
"මම මාතලෙන් ආවේ. නවාතැන් නෑ. හරියට කෑම බීම නෑ. ප්ලේන්ටියක් බොන්න තැනක් නෑ. ගෙවීම් පරක්කුයි. අපි බලපු ඒවටත් තවම ගෙවීම් කරලා නෑ. සහකාර පරීක්ෂකවරුත් ගෙන්වලා. අපිට තියෙන දවස් තුනේ වැඩකොටස අඩුවෙලා. වෙනදට ප්‍රශ්නයක් නෑ. මම 2200ක් දීලා කාමරයක හිටියේ."
ඇතැම් ගුරුවරු අධික මුදලක් වැයකර නවාතැන් ස්ථාන සොයාගෙන තිබූ අතර එලෙස මුදල් වියදම් කරමින් මෙවැනි කටයුත්තක් සිදුකිරීම අපහසු බව පවසමින් ඔවුන් අද (20) ප්‍රශ්න පත්‍ර නැවත සමීක්ෂණ කටයුතුවලින් ඉවත් වූ බව ද වාර්තාවේ.
එමෙන්ම ශිෂ්‍යත්වය ප්‍රතිඵල නැවත සමීක්ෂණය සඳහා දිවයින පුරා සිටින ප්‍රශ්න පත්‍ර ඇගයීම් කටයුතු සිදුකරන ගුරුවරුන්ට දින තුනක් සඳහා පැමිණෙන ලෙස දැනුම්දී තිබුණි.
මෙහිදී විභාග දෙපාර්තමේන්තුවේ නිලධාරීන් ඉතා පහත් ලෙස තමන්ට සැලකූ බවට ද ගුරුවරු චෝදනා කර සිටි අතර විභාග දෙපාර්තමේන්තුවේ නිලධාරීන් සහ ගුරුවරුන් අතර උණුසුම් වචන හුවමාරුවක් ද සිදුවුණි.
එම අවස්ථාවේදී විභාග දෙපාර්තමේන්තුවේ කොමසාරිස් ජනරාල්වරයා පැමිණ ගුරුවරුන්ව නැවත සමීක්ෂණ කටයුතු සඳහා රැගෙන යෑමට සහ ගැටලුව විසඳීමට මැදිහත් වූ අතර පසුව ඔවුන් එම ස්ථානයෙන් පිටව ගියේය.
කෙසේ වෙතත් විභාග කොමසාරිස් ජනරාල්වරයා ප්‍රකාශ කර සිටියේ සිදුවූ අපහසුතාවය සම්බන්ධයෙන් තමන් කනගාටුවන බවය.
