මුදල් ඇමැති සුනිචි සුෂුකි සිය ශ්‍රී ලංකා සංචාරයේදී ජනාධිපති රනිල් වික්‍රමසිංහ සහ විදේශ කටයුතු ඇමැති අලී සබ්‍රි හමුවී සාකච්ඡා කිරීමට නියමිතයි.
එහිදී පැවැත්වෙන ද්වී-පාර්ශ්වික සාකච්ඡාවලදී ශ්‍රී ලංකාවේ ණය ප්‍රතිව්‍යුහගතකරණය සම්බන්ධයෙන් වැඩි අවධානයක් යොමු කිරීමට නියමිත බව විදේශ කටයුතු අමාත්‍යාංශය පවසයි.
ජපාන මුදල් අමාත්‍යවරයෙකු මෙලෙස දිවයිනට පැමිණෙන්නේ වසර 10 කට පසුව බව ජපානයේ ශ්‍රී ලංකා තානාපති රොඩ්නි එම්.පෙරේරා ප්‍රකාශ කරයි.
ශ්‍රී ලංකාවේ රැඳී සිටින කාලයේ ජපාන මුදල් ඇමැතිවරයා ප්‍රමුඛ දූත කණ්ඩායම පාර්ලිමේන්තුව, ජයවර්ධන මධ්‍යස්ථානය, ශ්‍රී ජයවර්ධපුර රෝහල, කොළඹ තටාකාංගනය සහ මහරගම ලංකා නිපොන් බිස්ටෙක් ආයතනය යන ස්ථානවල සංචාරය කිරීමට ද නියමිත බව එම අමාත්‍යාංශය සඳහන් කරයි.
ශ්‍රී ලංකාවට ණය දෙන්නන් අතර ජපානයට ප්‍රධාන ස්ථානයක් හිමි වන අතර, ඒ අනුව ණය පියවීමේ කාලය දීර්ඝ කිරීම මෙන්ම පොලී අනුපාත පහත හෙළීම සම්බන්ධයෙන් පසුගිය නොවැම්බර් මාසයේදී මූලික එකඟතාවකට එළැඹ තිබෙන බව ද, ණය ප්‍රතිව්‍යුහගත කිරීමේ ක්‍රියාවලිය ස්ථාවර ප්‍රගතියක් ගැනීම සඳහා වැදගත් වන බව ද ජපාන මුදල් ඇමැතිවරයා පවසා තිබේ.
-P.M
