නව තාක්ෂණය භාවිතා කරමින් වේළන ලද කරවල හා උම්බලකඩ කිලෝග්‍රෑම් 10,000කින් යුත් පළමු කන්ටේනරය පහජ්ජාව මෙගාෆිෂ් ආයතනය විසින් පසුගිය දා (14) අපනයනය කරනු ලැබීය. මේ නිෂ්පාදන ඔස්ට්‍රේලියාවට හා කොරියාවට අපනයනය කරනු ලබයි.
සාම්ප්‍රදායික නිෂ්පාදන ක්‍රමයේදී මුහුදු වෙරළේ අව්වේ මාළු වේලනු ලැබූවත් මෙම නව ක්‍රමයේදී, සාමාන්‍යයෙන් ටූනා වර්ගයක් වන මත්ස්‍යයන් ‘වායු සමීකරණ විජලනය’ භාවිතයෙන් වියළා හෝ සැකසීම සිදු කරයි.
මෙම ක්‍රමය මඟින් අපට මිනිස් පරිභෝජනයට ඉතා සුදුසු කරවල නිෂ්පාදන වෙළෙඳපොළට ඉදිරිපත් කළ හැකි බවත් එමගින් රටට අවශ්‍ය විදේශ විනිමය රට තුළට ලැබෙන බවත් කෘෂිකර්ම හා වැවිලි කර්මාන්ත අමාත්‍යවරයා පවසා සිටියහ.
මෙම විජලනය කිරීමේ ක්‍රමය මෙරට තවත් නිෂ්පාදන කිහිපයක් සඳහා භාවිත කළ හැකි බව අමරවීර පෙන්වා දුන්නේය.
කෘෂිකර්ම හා වැවිලි කර්මාන්ත ඇමැති මහින්ද අමරවීර වැඩිදුරටත් පවසා සිටියේ,
තමා 2018 වසරේ ධීවර ඇමැතිරයාව සිටියදී මේ ව්‍යාපෘතිය ආරම්භ කිරීමට මූලික පියවර ගත් බව පැවසීය. ‘එවකට ජලජීවි වගා සංවර්ධන අධිකාරියේ සභාපතිවරයා වශයෙන් කටයුතු කළ ජනාධිපති නීතිඥ උපාලි මොහොට්ටි මහතා මේ ව්‍යාපෘතියට යෝජනා ඉදිරිපත් කළා. අද එම ව්‍යාපෘතිය සාර්ථක වී තිබෙනවා. සාම්ප්‍රදායික කරවල සැකසීමේදී බොහෝවිට අපද්‍රව්‍ය ඊට එකතු වීමට ඉහළ සම්භාවිතාවක් තිබෙනවා. ලුණු වැඩිපුර යොදන්නේ ඒ තත්ත්වය වළක්වාලීමටයි. නමුත් පළමුවරට වායුසමීකරණ පද්ධති යොදා ගනිමින් සිදු කෙරෙන මේ කර්මාන්තශාලවේ කරවල නිෂ්පාදනයේ දී අඩුම තරමින් දූවිලි ටිකක් හෝ මැස්සෙක්වත් ඇතුළුවීමට අවකාශයක් ලැබෙන්නේ නැහැ. යනුවෙනි.
කෙසේ වෙතත් ශ්‍රී ලංකාවේ නිෂ්පාදනය කරන කරවල සහ මාළු කැබලි ඕස්ට්‍රේලියාවට සහ කොරියාවට අපනයනය කරන පළමු අවස්ථාව මෙය වේ.
