අදාළ පාසල් ‘ටැමිල් චෝලායි‘ ලෙස පොදු නමකින් හැඳින්වෙන අතර එල්.ටී.ටී.ඊ.ය ප්‍රතිසංවිධාන ගත කිරීමට අදාළව ද්‍රවිඩ තරුණ පිරිස් බල මුළුගැන්වීම එහිදී සිදුවන බවද ඒ මහතා පෙන්වා දෙයි.

දැනටමත් එවැනි පාසල් 300ක් පමණ යුරෝපා රටවල පිහිටුවා තිබෙන බව පෙන්වාදෙන ශ්‍රී ලංකා තානාපතිවරයා අවුරුදු 04 ත් 21ත් අතර වයසේ 20,000 ට වැඩි පිරිසක් ඒවායේ ඉගෙනුම ලබන බවද කියාසිටී.

ශ්‍රී ලංකා යුද හමුදාව සංවිධානය කළ ආරක්ෂක සම්මන්ත්‍රණයට සහභාගි වෙමින් රවිනාථ ආරියසිංහ මහතා මේ බව සඳහන්කර ඇත.

එල්.ටී.ටී.ඊ සංවිධානය සෘජුව හා වක්‍රව පරිපාලනය කරන මෙම පාසල්වලට එකී රටවල රජයන් ද මූල්‍යමය අනුග්‍රහය දක්වන බවට තොරතුරු ලැබී තිබෙන බව සඳහන්කර තිබෙන තානාපතිවරයා එල්.ටී.ටී.ඊය විසින් සහ ඊට සහාය දක්වන වෙනත් සංවිධාන විසින් මෙහෙයවනු ලබන විවිධ ක්‍රියාකාරකම්වලට ද මේ පාසල්වල ඉගෙනුම ලබන සිසුන් සහභාගි කරවා ගැනෙන බවට අනාවරණය වී ඇතැයි ප්‍රකාශකර තිබේ.

කෙසේ වෙතත් එල්.ටී.ටී.ඊ ය මැඩපැවැත්වීම සඳහා යුරෝපා සංගමය විවිධ ක්‍රියාමාර්ග ගෙන ඇතැයි ද රවිනාථ ආරියසිංහ මහතා පෙන්වා දී ඇති බව වාර්තා වෙයි.

එසේම යුරෝපෝල් (EUROPOL) විසින් මෑතක දී එළිදක්වන ලද ‘2014 යුරෝපීය ත්‍රස්ත තත්ත්වයන් සහ නැඹුරුතාවයන් පිළිබඳ වාර්තාව‘ ඔස්සේ එල්. ටී. ටී. ඊ. ය ලොව පුරා විහිදී ඇති ආකාරය පිළිබඳව යුරෝපාකරය අධ්‍යයනය කරමිනි සිටින අතර ඒ ඔස්සේ යුරෝපයේ රටවල් ත්‍රස්ත කටයුතු වැළැක්වීම සඳහා සැලසුම් සකස් කරමින් පවතී.