ජෝර්දාන ශ්‍රී ලංකා තානාපති කාර්යාලයේ නිලධාරින් පසුගියදා එරට කම්කරු අමාත්‍යාංශයේ නිලධාරීන් හමුවී මෙම ගැටලුව පිළිබඳව සාකච්ඡා කළ බවයි විදේශ සේවා නියුක්ති කාර්යාංශය පැවසුවේ.
එහිදී වීසා කාලය ඉක්මවා රැදී සිටින ශ්‍රමිකයින්ව දඩ මුදල් අය කිරීමකින් තොරව පිටත් කර එවීමට ජොර්දාන කම්කරු අමාත්‍යාංශයේ නිලධාරීන් එකඟතාව පලකර තිබේ.
විදේශ සේවා නියුක්ති කාර්යාංශය පැවසුවේ, ඒ සඳහා ගුවන් ටිකට්පත් ලබාදීමටත් සමාජ ආරක්ෂණ දායක මුදල් පිටත්ව එන දින ලබාදීමටත් වාචික එකඟතාවය පළකර ඇති බවයි.
එසේම හිඟ වැටුප් හා දීමනා ලබාදීම සඳහා කම්කරු හා වෘත්තීය අයිතිවාසිකම් පිළිබඳ විශේෂඥ දැනුමෙන් යුතු නීතීඥ සහය ලබාගැනීමටත් , සමාජ ආරක්ෂණ දායක මුදල් පසුගිය මස පළමුවැනිදා ලබාදීමටත් ජෝර්දාන කම්කරු අමාත්‍යාංශයේ අවදානය යොමුවී තිබේ.
විදේශ සේවා නියුක්ති කාර්යාංශය පැවසුවේ සාකච්ඡාවේදී එළැඹි තීරණ සම්බන්ධයෙන් එම ඇඟලුම් කර්මාන්ත ශාලාවල සේවය කළ ශ්‍රී ලාංකික ශ්‍රමිකයින්ට දැනුම්ද දුන් බවයි.
ඒ අනුව අදාල ශ්‍රමිකයින් අතරින් වෙනත් රැකියා ස්ථානවලට යාමට අපේක්ෂා කරන්නන් ඊට යොමුකිරීමටත්, දිවයිනට පැමිණීමට අපේක්ෂා කරන ශ්‍රමිකයින් කඩිනමින් දිවයිනට ගෙන්වා ගැනීමටත් පියවර ගනිමින් ඇතැයි විදේශ සේවා නියුක්ති කාර්යාංශය සඳහන් කළේ ය.
-P.M
