“... ශ්‍රී ලංකාවේ විදුලි පිරිවැය අඩු කිරීම සඳහා කොචි සිට කොළඹ දක්වා අතථ්‍ය LNG නල මාර්ගයක් පිහිටුවීමට ද අපි කටයුතු කරමින් සිටිමු,” යැයි පසුගිය සිකුරාදා ඉන්දියාවේ 75 වැනි ජනරජ දිනය සනිටුහන් කරමින් කොළඹ නව ඉන්දීය මහ කොමසාරිස් සන්තෝෂ් ජා පැවසීය.
(අතථ්‍ය LNG නල මාර්ගයක් යනු භෞතික නල මාර්ග සඳහා විකල්පයක් වන අතර, මුහුද, මාර්ග, දුම්රිය හෝ ඒවායේ සංයෝජනයක් වැනි විවිධ ක්‍රම හරහා LNG අපේක්ෂිත ගමනාන්තයට ප්‍රවාහනය කරයි. මුහුද හරහා ප්‍රවාහනයේදී ගෑස් ද්රවීකරණය කර නැවකින් රැගෙන යයි.)
එහිදී අදහස් දැක්වූ සන්තෝෂ් ජා, ඉන්දියාවට විදුලිය අපනයනය කිරීමට හැකි විදුලිබල ජාල සම්බන්ධක ව්‍යාපෘතියක් සහ ත්‍රිකුණාමලය ආර්ථික මධ්‍යස්ථානයක් ලෙස සංවර්ධනය කිරීමේ ඒකාබද්ධ මුලපිරීම ඇතුළු ප්‍රධාන ව්‍යාපෘති පිළිබඳ ප්‍රතිපත්ති මට්ටමේ ගිවිසුම්වලට පැමිණීමෙන් පසුව මෙම නවතම බලශක්ති සහයෝගීතා පියවර ගත් බව සඳහන් කරයි.
2022 වන විට ඩොලර් බිලියන 6 ක ද්විපාර්ශ්වික වෙළඳාමක් සහිත ශ්‍රී ලංකාවේ විශාලතම වෙළඳ සහකරු ඉන්දියාව බව පෙන්වා දුන් මහ කොමසාරිස්වරයා, “ආර්ථික සහ තාක්ෂණ සහයෝගිතා ගිවිසුම (ETCA) ඉක්මනින් අවසන් කිරීම හරහා ආර්ථික හවුල්කාරිත්වය සහ ශ්‍රී ලංකාවේ අපනයන විභවය වැඩිදියුණු කිරීමට බලාපොරොත්තු වන බව ප්‍රකාශ කළේය.
අද වන විට, මෙරට සෑම දිස්ත්‍රික්කයකම පාහේ සංවර්ධන හවුල්කාරිත්වයන් සඳහා ඉන්දියාව ඩොලර් බිලියන 5 කට වඩා දායක වී ඇති බව ඔහු සඳහන් කළේය.
75 වැනි ජනරජ දිනය නිමිත්තෙන් ධජය එසවීමේ උත්සවය සිකුරාදා ඉන්දියා හවුස්හිදී පැවැත්වුණු අතර පිළිගැනීමේ උත්සවය පසුවදා පැවැත්විණි.
