විදේශ කටයුතු අමාත්‍යාංශය පැවසුවේ, හෙට පැවැත්වෙන 76 වැනි නිදහස් සමරු උත්සවයේ ආරාධිතයා වශයෙන් සහභාගිවීම සඳහා ජනාධිපති රනිල් වික්‍රමසිංහගේ ආරාධනයෙන් තායිලන්ත අග්‍රාමාත්‍යවරයා දිවයිනට පැමිණෙන බවයි.
මෙම සංචාරය අතරතුර තායිලන්ත අග්‍රාමාත්‍යවරයා ජනාධිපති රනිල් වික්‍රමසිංහ සමග නිල සාකච්ඡා පැවැත්වීමට නියමිත අතර ශ්‍රී ලංකා තායිලන්ත නිදහස් වෙළෙඳ ගිවිසුමට අත්සන් තැබීමේ අවස්ථාවට එක්වීමටද නියමිතව තිබේ.
තායිලන්තයේ නියෝජ්‍ය අග්‍රාමාත්‍ය සහ එරට වාණිජ අමාත්‍ය ෆූම්තාම් වෙචයචායි සහ ශ්‍රී ලංකාවේ වෙළෙඳ, වාණිජ හා ආහාර සුරක්ෂිතතා අමාත්‍ය නලින් ප්‍රනාන්දු යන මහත්වරුන් නිදහස් වෙළෙඳ ගිවිසුම අත්සන් කරනු ඇති.
දෙරට අතර වෙළෙඳ සහ ආයෝජන සබඳතා වර්ධනය කිරීම ශ්‍රී ලංකා-තායිලන්ත නිදහස් වෙළෙඳ ගිවිසුමෙන් අපේක්ෂිත බව විදේශ කටයුතු අමාත්‍යංශය සඳහන් කළේ ය.
එම අමාත්‍යාංශය නිකුත් කළ නිවේදනයක දැක්වුණේ මීට අමතරව, දෙරට අතර පවතින ගුවන් සේවා ගිවිසුම අලුත් කිරීමට දෙපාර්ශ්වය අපේක්ෂා කරන අතර ශ්‍රී ලංකා මැණික් හා ස්වර්ණාභරණ පර්යේෂණ හා අභ්‍යාස ආයතනය සහ තායිලන්ත මැණික් හා ස්වර්ණාභරණ ආයතනය අතර අවබෝධතා ගිවිසුමක් අත්සන් කිරීමට ද නියමිත බවයි.
මෙම නිල සංචාරය සඳහා තායිලන්ත අග්‍රාමාත්‍යවරයා, තායිලන්ත නියෝජ්‍ය අග්‍රාමාත්‍යවරයා, නියෝජ්‍ය විදේශ අමාත්‍යවරයා, මෙන්ම ඉහල පෙලේ ව්‍යාපාරිකයින් ඇතුළු 39 දෙනෙකුගෙන් සමන්විත නියෝජිත පිරිසක් පැමිණීමට නියමිත බව විදේශ කටයුතු අමාත්‍යාංශය සඳහන් කළේ ය.
-P.M
