කොරියානු ජනරජයේ තානාපති මියොන් ලී හා අගමැතිවරයා අතර කොළඹ අගමැති කාර්යාලයේ දී පැවැති හමුවේ දී තානාපතිවරිය එලෙස ප්‍රකාශ කර තිබේ.
අගමැතිවරයාගේ ඉල්ලීම පරිදි පාසල් මට්ටමින් තොරතුරු තාක්ෂණ අධ්‍යාපනය දියුණු කිරීමට රජය ගන්නා උත්සාහයට සහාය වීම සඳහා ශ්‍රී ලංකාවේ පාසල් 1, 000කට සුහුරු පන්ති කාමර ලබාදීමට කොරියාව එකඟ විය.
එමෙන්ම රජයේ රෝහල්වල කෙටිකාලීනව වෛද්‍ය කටයුතුවල යෙදීම සඳහා වෛද්‍යවරුන් සහ වෛද්‍ය කණ්ඩායම් ශ්‍රී ලංකාවට එවීමටත් මෙරට වෛද්‍යවරුන් සමඟ ඔවුන්ගේ විශේෂඥ දැනුම බෙදා ගැනීමටත් කොරියාව කටයුතු කරන බවත් දැනට ක්‍රියාත්මක ව්‍යාපෘති කඩිනමින් නිම කිරීමට අමතරව ශ්‍රී ලංකාවේ නව සංවර්ධන ව්‍යාපෘති කිහිපයක් ක්‍රියාත්මක කිරීම සඳහා තම රට කටයුතු කරන බව තානාපති මියොන් ලී මහත්මිය පැවැසුවාය.
ජල පිරිපහදුව, සනීපාරක්ෂාව, අපද්‍රව්‍ය බැහැර කිරීමේ පද්ධති සහ වියළි කලාපීය කෘෂිකර්මාන්තය පිළිබඳ ව්‍යාපෘති තුනක් දැනටමත් ක්‍රියාත්මක කර ඇති බව එම මහත්මිය පැවැසුවා ය. පුනර්ජනනීය බලශක්තියට අදාළ නියමු ව්‍යාපෘතියක් ලෙස රත්නපුර දිස්ත්‍රික්කයේ චන්ද්‍රිකා වැව මත පාවෙන සූර්ය පැනල සවි කිරීම ද කොරියාව විසින් සිදු කරනු ලබන අතර ශ්‍රී ලාංකික ශ්‍රමිකයින් සඳහා පුහුණු/වෘත්තීය අංශවල මෙන්ම කාලීනව කෘෂිකාර්මික අංශයේ රැකියා කෝටාව වැඩි කිරීමට කොරියානු නායකයින් එකඟ වී ඇත.
සිය කෙටි සංචාරයේ දී ලබාදුන් විශිෂ්ට සහයෝගිතාව සහ ආගන්තුක සත්කාරය පිළිබඳව අගමැතිවරයා මෙහි දී කොරියානු රජයට ස්තුතිය පළ කළේ ය.
