බදුල්ල, කොළඹ, ගම්පහ, කළුතර, මහනුවර, කෑගල්ල, ගාල්ල , කුරුණෑගල සහ රත්නපුර දිස්ත්‍රික්කවල ප්‍රාදේශීය ලේකම් කොට්ඨාස රැසක නායයෑම් පිළිබඳ අනතුරු ඇඟවීමේ නිවේදනය බලාත්මකයි.
මේ අතර අධික වැසි සහිත කාලගුණ තත්ත්වයෙන් දිස්ත්‍රික්ක 9ක පවුල් 9419ක, පුද්ගලයින් 35,357 දෙනෙකු මේ වනවිට පීඩාවට පත්ව සිටින බවවාර්තා වේ.
වැඩිම පිරිසක් පීඩාවට පත්ව ඇත්තේ පුත්තලම දිස්ත්‍රික්කයේයි.
එම සංඛ්‍යාව 32,000 කි.
වර්ෂාවත් සමග කළු ගගේ අතු ගංගාවක් වන කුඩා ගඟ හා අත්නගලු ඔය තවදුරටත් සුළු ගංවතුර මට්ටමේ පවතින බව වාරි මාර්ග දෙපාර්ත්මේන්තුව පවසයි.
එහි ජල විද්‍යා අංශයේ අධ්‍යක්ෂ එස්. පී. සී. සුගීෂ්වර මහතා කළු ගිං නිල්වලා හා කැලණි යන ගංගාවල ජල මට්ටම් ද ඉහළ යමින් පවතින බවයි.
පැවති වර්ෂාව සමග ඇති වූ සුළඟින් කැලණි වැලි මාර්ගයේ පන්නිපිටිය හා කොට්ටාව අතර දුම්රිය මාර්ගයට ඊයේ පස්වරුවේ ගඩා වැටුණු ගස ඉවත් කර තිබේ.
ගස කඩා වැටීමෙන් දුම්රිය ගමනාගමනයට බාධා එල්ල වූ අතර අප වාර්තාකරු පැවසුවේ, මගීන් ගේ සහ දුම්රිය දෙපාර්තමේන්තු සේවකයින්ගේ මැදිහත්වීමෙන් ගස ඉවත් කිරීමට පැය 2ක පමණ කාලයක් ගත වූ බවයි.
අත්තනගලු ඔයේ ජල මට්ටම ඉහළ යාමෙන් යටවූ ගම්පහ කඳාන සහ ජාඇල මාර්ග තවදුරටත් ජලයෙන් යටව පවති.
බලංගොඩ ප්‍රදේශයට ද ඊයේ පස්වරුවේ සිට දැඩි වර්ෂාවක් ඇද හැළුණි.
වර්ෂාව සමග හමා ගිය දැඩි සුළඟින් බලංගොඩ රාස්සගල ප්‍රදේශයේ නිවසක් මතය කිතුල් ගසක් කඩා වැටී ඇත.
අනතුර පරීක්ෂා කිරීම සඳහා යමින් සිටි අසල්වැසියෙකු මතට ද අසළ තිබූ තවත් කිතුල් ගසක් කඩා වැටී ඇති අතර තුවාලකරුවන් දෙදෙනාම බලංගොඩ රෝහලට ඇතුළත් කර ඇත.
මේ අතර බංගොඩ වටවල ප්‍රදේශයේ නිවසක් මතට ද ගසක් කඩා වැටීමෙන් 54 හැවිරිදි කාන්තාවක් තුවාල ලැබුවාය.
වැසි සහිත කාලගුණ තත්ත්වය පහව යාම හේතුවෙන් හලාවත කලාපයේ සියලුම පාසල් අද යළිත් අධ්‍යන කටයුතු සඳහා ආරම්භ කරන බව වයඹ පළාත් ප්‍රධාන අමාත්‍යාංශය දැනුම් දෙයි.
-P.M
