බිබිසි සංදේශයට ප්‍රකාශයක් දෙමින් ඔහු එබව සඳහන් කළේය. 



මහින්ද තවමත් ඉදිරියෙන් -දයාන්


පොදු අපේක්ෂකයා ලෙස ශ්‍රී ලංකා නිදහස් පක්ෂයේ මහලේකම් මෛත්‍රීපාල සිරිසේන තරග බිමට පැමිණියත් තවමත් ජනාධිපතිවරණය ජයග්‍රහණය කිරීමට වැඩි ඉඩ කඩ ඇත්තේ ජනාධිපති මහින්ද රාජපක්ෂ මහතාට බවද ඔහු කියා සිටියේය.  

ගැමි ගොවි පදනමකින් පැමිණි, ජනතාවට ඉතා සමීප දීර්ඝ කාලීන දේශපාලන අත්දැකීම් ඇති මෛත්‍රීපාල සිරිසේන වැනි චරිතයක්, පොදු අපේක්ෂකයා ලෙස ජනාධිපතිවරණයට ඉදිරිපත් වීමෙන් ජනාධිපතිවරණය ඉතා තරගකාරී එකක් බවට පත්ව ඇති බව  ආචාර්ය දයාන් ජයතිලක මහතා පෙන්වා දෙයි.

‘ඔහුගේ පැමිණීම සාධනීය දෙයක්, ඒකෙන් අදහස් වෙන්නේ නැහැ සිරිසේන මහත්මයා දිනලා, රාජපක්ෂ මහත්මයා පරදියි කියලා. නමුත් මෙතන තරගයක් තියෙනවා, නොතිබිච්ච් දේශපාලන අවකාශයක් විවෘත වෙලා තියෙනවා’ ආචාර්ය දයාන් ජයතිලක මහතා පැවසීය.


'කුමන්ත්‍රණ ආපස්සට'


පොදු අපේක්ෂකයා පිටුපස ජාත්‍යන්තර කුමන්ත්‍රණයක් ඇති බවට ආණ්ඩුව නගන චෝදනාවට කිසිදු සාක්ෂියක් නොමැති බව පැවසූ ආචාර්ය දයාන් ජයතිලක මහතා, පොදු අපේක්ෂයා ලෙස මෛත්‍රීපාල සිරිසේන මහතා පැමිණීම ජාත්‍යන්තර කුමන්ත්‍රණ ආපස්සට තල්ලු කිරීමට හේතුවී ඇති බව  කියා සිටියේ ය. 

පසුගිය දා බිබිසියට අදහස් දක්වමින් ජ්‍යෙෂ්ඨ මාධ්‍යවේදී වික්ටර් අයිවන් පැවසුවේ වර්තමාන දේශපාලන තත්වය අනුව ජනාධිපති මහින්ද රාජපක්ෂ පරාජය වීමේ ඉඩකඩ වැඩි බවයි.

නමුත් ආචාර්ය දයාන් ජයතිලක මහතා පවසන්නේ රනිල් වික්‍රමසිංහ, චන්ද්‍රිකා කුමාරතුංග යන චරිතවලට සාපේක්ෂව මෛත්‍රීපාල සිරිසේනට මහින්ද රාජපක්ෂ පරාජය කිරීමට හැකියාවක් ඇතත් වැඩි ඉඩකඩ ඇත්තේ ජනාධිපති මහින්ද රාජපක්ෂගේ ජයග්‍රහණයට බවයි.


'පඹ ගාලක'


" සිරිසේන මහත්මයා චරිතයක් ලෙස තරගයක් දෙන්න විශාල හැකියාවක් තිබුණු සහ තියෙන චරිතයක්, නමුත් එතුමා පැමිණීම හොඳ පියවරක් උනත්, අරගෙන තිබෙන දේශපාලන ස්ථාවරයන් පිළිබඳව බලන කොට තමාවම පටලවා ගෙන තිබෙනවා පඹ ගාලක" ආචාර්ය දයාන් ජයතිලක මහතා පැවසීය.

මෛත්‍රීපාල සිරිසේන පොදු අපේක්ෂකවරයා තමන් හොදින් හඳුනන බහුතර ගැමි ගොවි ජනතාවගේ සිතුම් පැතුම් අනුව වැඩපිළිවෙළක් ඉදිරිපත් නොකර දින 100කින් ව්‍යවස්ථා වෙනස් කිරීම වැනි වැඩපිළිවෙළක් ඉදිරිපත් කිරීම අවාසනාවක් බව  ආචාර්ය දයාන් ජයතිලක මහතා කියා සිටියේය.

" විධායක ජනාධිපතිදුරය අහෝසිකරන්න කියලා රටේ ජනතාවගෙන් බහුතරයක් ඉල්ලනවා කියලා කිසිම සාක්ෂියක් නැහැ" ආචාර්ය දයාන් ජයතිලක මහතා පැවසීය.


මෙවර ජනාධිපතිවරණයට ඉදිරිපත් වන ප්‍රධාන අපේක්ෂකයන් දෙදෙනා ම එක්තරා ආකාරයකට වෙස් මුහුණු චරිත බව පැවසූ ආචාර්ය දයාන් ජයතිලක මහතා, ඔවුන් දිහා පමණක් බලා තීරණයක් ගැනීමට ජනතාවට නොහැකි තත්වයක් උදාවී ඇති බව  පෙන්වා දෙයි.