‘අපි රජයත් එක්ක සාකච්ඡා කිරීමේ අවකාශයක් මැතිවරණයේ තීන්දුව ලැබුණට පස්සේ, නැවත වාරයක් අපි තීන්දුවකට එළඹෙනවා’ යනුවෙන් ශ්‍රී ලංකා මුස්ලිම් කොංග්‍රසයේ නායක රවුෆ් හකීම් අද ඉරිදා කොළඹ පැවති මාධ්‍ය සාකච්ඡාවකට එක් වෙමින් කියා සිටියේය.
නැගෙනහිර පළාත් සභාව තුළ ආණ්ඩුව සතු බලය බිඳ දැමීමට තමා කිසිසේත් අදහස් නොකරන බවත් මුස්ලිම් කොංග්‍රසයේ නායක රවුෆ් හකීම් පැවසුවේය.
‘නැගෙනහිර පළාත් සභාවේ, එතන අපි තීරණාත්මක සාධකයක්. අපි නැතුව බහුතරයක් නැහැ. ඒ බහුතරය නැති කිරීමේ ක්‍රියාදාමයක අපි නියැලෙන්නේ නැහැ කියනදේ පැහැදිලිව කියන්න ඕනි’ යනුවෙන් රවුෆ් හකීම් වැඩි දුරටත් සඳහන් කළේය.
වර්තමානයේ පවතින දේශපාලන ප්‍රවනතාව සලකා බලා තම පක්ෂය, විපක්ෂයේ පොදු අපේක්ෂක මෛත්‍රීපාල සිරිසේනට සහාය ලබා දීමට තීරණය කළ බවයි මුස්ලිම් කොංග්‍රසයේ නායක රවුෆ් හකීම් වැඩි දුරටත් කියා සිටියේ.
හකීම් බෙදුම්වාදියෙක්
මේ අතර, ශ්‍රී ලංකා මුස්ලිම් කොංග්‍රසය වෙනම මුස්ලිම් කලාපයක්‌ ඉල්ලා සිටියද ජනාධිපති මහින්ද රාජපක්‍ෂ මහතා එයට එකඟ නොවීම නිසා කොංග්‍රසය රජය හැර ගිය බව එක්‌සත් ජනතා නිදහස්‌ සන්ධානයේ මහලේකම් සුසිල් ප්‍රේමජයන්ත මහතා ඊයේ පැවැති ප්‍රවෘත්ති සාකච්ඡාවකදී ප්‍රකාශ කළේය.
එක්‌සත් ජනතා නිදහස්‌ සන්ධානය කිසිම විටක දේශපාලන පක්ෂවල අන්තවාදී ඉල්ලීම්වලට නතු නොවන බවද හෙතෙම කීය. මුස්ලිම් කොංග්‍රසය 2005 දී රනිල් වික්‍රමසිංහ මහතාට සහාය ලබා දුන් අතර 2010 සරත් ෆොන්සේකා මහතාටත් 2010 මහ මැතිවරණයේදී එක්‌සත් ජාතික පක්‍ෂයෙන් ඡන්ද ඉල්ලූ බවත් මෙහිදී ඇමැතිවරයා අවධාරණය කළේය.
කල්මුණේ. සමන්තුරේ හා පොතුවිල් එක්‌කර වෙනම දිස්‌ත්‍රික්‌කයක්‌ ලබා ගැනීම ඔවුන්ගේ මූලික අභිප්‍රාය බවද ඇමැතිවරයා කීය.
වාර්ගික පදනමින් දිස්‌ත්‍රික්‌ක ඇතිකිරීම කොහෙත්ම කළ නොහැකි බව හෙතෙම අවධාරණය කළේය.
