ඒ මහතා එසේ පැවැසුවේ කොළොන්නාව උමගිලිය ක්‍රීඩාංගණයේදී පැවැත්වූ මැතිවරණ ප්‍රචාරක රැලියක් අමතමිනි.
කොළොන්නාව එ. ජා. ප. සංවිධායක බස්නාහිර පළාත් සභා මන්ත්‍රි එස්. එම්. මරික්කාර් මහතා විසින් සංවිධානය කර තිබූ මෙම මහජන රැලියේදී සිරිසේන මහතා පැවැසුවේ විධායක ජනාධිපති ක්‍රමය අහෝසි කිරීමේ පොරොන්දුව තුන් වැනි වතාවටත් සිය මැතිවරණ ප්‍රකාශයට ඇතුළත් කිරීම තුළින් ජනාධිපතිවරයා මෙරට ජනතාවගේ බුද්ධියට බරපතළ නිගාවක් කර ඇති බවයි.
මෛත්‍රිපාල සිරිසේන මහතා මෙසේද කීවේය,
අද මහින්ද රාජපක්ෂ මහත්තයාගේ මැතිවරණ ව්‍යාපාරය කඩා වැටිලා ඉවරයි. නිකුත් කරපු මැතිවරණ ප්‍රකාශය හරිම හාස්‍යජනකයි, උපහාසාත්මකයි. තුන් වැනි වරටත් විධායක ජනාධිපති ක්‍රමය අහෝසි කරනවා කියනවා. දිනල අවුරුද්දකින් මේක කරනවලු. ඔය කාරණය 2005දීත් 2010දීත් කිව්වා. දැන් ඊයේ එකෙත් තියෙනවා. මෙය ජනතාවගේ බුද්ධියට හා දැනුමට කරපු බරපතළ නිගාවක්. මේකෙන් පේනවා මේගොල්ලන්ගේ ප්‍රචාරක යාන්ත්‍රණය බරපතළ සෝදාපාළුවකට ලක්වෙලා කියලා.
ඉදිරි දින 10 තුළ ඒගොල්ලන්ට අපිව අභිභවා යන්න ලැබෙන්නේ නැහැ. දැනටමත් අපි මේ රේස් එකේ ඉදිරියෙන් ඉන්නේ. ආණ්ඩුව පැත්තෙන් හෙට අනිද්දත් එනවා.
ජනාධිපති මැතිවරණ ප්‍රකාශය හැටියට බෙදන්න තිබ්බෙ තුන්කල් දැක්ම කියන ප්‍රකාශය. හැබැයි බෙදුවෙ වෙන එකක්. දැන් තුන්කල් දැක්ම හදපු කෙනාත් නැහැ හොයා ගන්න. අභ්‍යන්තර අර්බුද, ප්‍රහාර නිසා මැතිවරණ වේදිකාවෙත් නැහැ. මේ මැතිවරණයේදී රටේ ජනතාව විපක්ෂයටත් ඉදිරියෙන් ඉන්නවා මේ මැතිවරණයෙන් ආණ්ඩුව පරද්දන්න.
අද ජනාධිපති මන්දිරය අවුල්වෙලා. ඇතුළෙ ඉන්න අය වැඩ කරන්නේ නැහැ. එළියට ආපු අයට වඩා වැඩියි ඇතුළෙ ඉඳන් වැඩ නොකරන අය.
යුද ජයග්‍රහණයේ අයිතිය එක පුද්ගලයකුගේ නොවේ. යුද්ධයේදී මියගිය රණවිරුවන්ටයි පළමු අයිතිය තියෙන්නේ. ආබාධිත වූ අයට දෙවැනි අයිතිය. පෙරමුණේ සටන් කර අද ජීවත්වන අයට තුන් වැනි අයිතිය. ඒ හා සමානවම බෝම්බවලින් හා එල්. ටී. ටී. ඊ.යේ ඝාතනවලට හසුවූ සිවිල් ජනතාවට ඊළඟ අයිතිය.
2009දී යුද්ධය දිනුවාට පස්සේ ජනතාව මහින්ද රාජපක්ෂ මහත්තයට කිව්වේ 'මහරජාණෝ' කියලා. ඊට පස්සේ එයා ඇත්තටම මහරජෙක් වෙන්න කල්පනා කරන්න ඇති. 2010දී ඔහු පුදුමාකාර විදියට වෙනස් වුණා. ඔහු 2/3 බලයක් පාර්ලිමේන්තුවේ හදාගෙන රටේ ජනතාවට යහපත් වන එකම පනතක්වත් පාර්ලිමේන්තුවේදී සම්මත කළේ නැහැ.
මහින්ද මහත්තයදැන් කියනවා එයා නැත්නම් මේ රටේ දේශපාලන අස්ථාවරත්වයක් ඇති වෙනවා කියල. එයා නැත්නම් ආපහු යුද්දෙ එනවලු. ආපහු එල්. ටී. ටී. ඊ. එනවලු. එහෙම බැලුවාම එයා තව අවුරුදු 100ක්වත් ඉන්න වෙනවා එල්. ටී. ටී. ඊ.ය එන නිසා. අද මේ රට අස්ථාවරයි. මුළු ලෝකයම අපේ රට දිහා පිළිකුලෙන් බලන්නේ. ජාත්‍යන්තර සංවිධාන අපි දිහා බලන්නේ නැහැ. ලෝක බැංකුව, ආසියානු සංවර්ධන බැංකුව සත 5ක් දෙන්නේ නැහැ. අපි ආවට පස්සේ දැන් 2/3ත් නැතිවෙලා.
මට ආරංචියි ඊයේ මේකෙ වීරයෝ ඇවිත් වෙඩි තියල සද්දෙ දැම්මයි කියල. අපි එළියට බැස්සේ බයේ මේ සටන දාල යන්න නොවේ. මහින්ද රාජපක්ෂගේ ධන බලය, අවි බලය හා රාජ්‍ය බලයට මුහුණ දෙන්න වෙන බව දැනගෙනයි. රටකට ඕනෑම අභියෝගයක් එල්ල වෙනකොට ඒකට විරුද්ධව ජීවිත පරිත්‍යාගයෙන් එළියට බහින්නේ වීරයෝ විතරයි. නිවටකමින් ජීවත් වෙනවාට වඩා ජනතාව වෙනුවෙන් මැරෙන එක සැපයි. අපි තුවක්කුවලට බය නැහැ. මරනවානම් මරපල්ලා.
මේ රටේ මැතිවරණයකදී මැතිවරණ නීති කඩපු මේ වගේ වෙන නායකයෙක් නැහැ. ඒක තමයි එයාගෙ යහපාලනය, ප්‍රජාතන්ත්‍රවාදය.
එයාගේ මැතිවරණ ප්‍රකාශයෙන් කියනවා අලුත් දේශපාලන සංස්කෘතියක් හදනවා කියල. එයාගේ අවුරුදු 10ක සංස්කෘතිය ජනතාව හඳුනනවා. දූෂණය හා අල්ලස රජවෙලා. රජයේ ව්‍යාපෘතියක් කරනකොට ඇස්තමේන්තු මුදලට වඩා 2/3ක් එකතු කරල ඒ 2/3 සාක්කුවට දාගන්නවා. දූෂණය බිලියන්, ටි්‍රලියන්වලින්.
දැන් කතා කරනවා අලුත් චින්තනයක් ගැන. මේ රටේ ජනතාව කවුරු කියලද හිතාගෙන ඉන්නේ මේ ගොල්ලො. මැදමුලන චින්තනේලු මැදමුලන චින්තනේ පොළොන්නරුවේ චින්තනෙන් ඉවර වෙනවා ලබන 08 වැනිදා.
මේ රටේ භාගයක් ජනතාව අද කන්නේ වේල් දෙකයි. අපි මේ රටේ ජනතාවගේ ප්‍රශ්න ගැන ආණ්ඩුව ඇතුළෙ කතා කළාම කිව්වේ ඔහොම යන්න දෙන්න ඡන්දෙ ළං කරල අඩු කරල දාමු කියලයි. එහෙම තමයි මේ රටේ පාලකයා ජනතාවගේ බඩගින්න ගැන හිතුවේ.
- මව්බිම ඇසුරිනි
