ඇමැතිවරුන්ට හා නියෝජ්‍ය ඇමැතිවරුන්ට ඇමැති ආරක්ෂක අංශ නිලධාරීන් පමණක් ආරක්ෂාවට යොදවන ලෙසද අගමැතිවරයා උපදෙස් දී තිබේ. එයද ඇමැතිවරුන්ට සාමාන්‍යයෙන් දෙන ආරක්ෂාව අනුව දෙන ලෙසද දැනුම් දී ඇතැයි රජයේ ආරංචි මාර්ග සඳහන් කරයි.
කෙසේවෙතත් ඇමතිවරුන්ට කොයි ආකාරයෙන් ආරක්ෂාව ලබාදිය යුතුද යන්න පිළිබඳ තීරණය ගැනීම සඳහා කමිටුවක් පත් කිරීමටද අගමැති රනිල් වික්‍රමසිංහ මහතා තීරණය කර ඇත. එම කමිටුව විසින් සාකච්ඡා කොට ලබාදිය යුතු ඇමැති ආරක්ෂකයන් සංඛ්‍යාව තීරණය කිරීමට නියමිතය.
එසේම ඇමැතිවරයාගේ රථයට අමතරව එක් පසුගමන් ආරක්ෂක රථයක් පමණක් භාවිතා කළ යුතු බවටද අගමැතිවරයා උපදෙස් දී තිබේ. ඇමැතිවරුන්ට පසු ගමන් රථ කිහිපයක් භාවිතා කිරීමද අගමැතිවරයා විසින් නවතා ඇත.
ඇමැතිවරුන් ගමන් කිරීමේදී මහජනතාවට හිරිහැරයක් කරදරයක් ඇති නොවන ආකාරයට ගමන් කළ යුතු බවත් ඇමැති ආරක්ෂක රථයද එලෙස කටයුතු කළ යුතු බවටත් ඔහු උපදෙස් ලබා දී ඇති බව වාර්තා වේ.
ඇමැතිවරුන්ට අමතරව නිලධාරීන්ට හා වෙනත් පුද්ගලයන්ට ලබාදී ඇති ආරක්ෂාව සම්බන්ධයෙන්ද පත් කරන ලද විශේෂ කමිටුව මගින් තීරණය කරන ලෙසටද උපදෙස් ලබා දී ඇත.
lakbima
