දළදා මාලිගාවට ලැබුණු මුදල් හා සම්පත් අයුතු ලෙස භාවිත කිරීම සම්බන්ධයෙන් දියවඩන නිලමේ නිලංග දෑල බණ්ඩාර මහතාට විරුද්ධව අල්ලස් හෝ දූෂණ චෝදනා විමර්ශන කොමිසම් සභාවට දූෂණ විරෝධී පෙරමුණ ඊයේ (29) පැමිණිල්ලක් කළේය.
දියවඩන නිලමේවරයාගේ මිනිකූපර්වර්ගයේ මෝටර් රථය නවීකරණය කිරීමට දළදා මාළිගාවේ මුදල් හා සම්පත් යොදාගෙන අැති බවත් ඒම මෝටර් රථය අලංකාර කිරීමට මාළිගාව සතු රත්රන් යොදා ගැනීම නිසාම ජනතාව පරිත්‍යාග කරන ලද බුදු පිළිම පිළිබදව ද සොයා බැලිය යුතු බව පූජ්‍ය උලපනේ සුමංගල හිමියෝ පැවසූහ.
මෝටර රථය අලුත් වැඩියා කිරිම සදහා මාලිගාවේ මුදල් යොදා ගෙන විදේශ කාර්මිකයන් දෙදෙනෙකු ගෙන්වා ගෙන අැති බව පැවසූ හිමියෝ දළදා මාලිගාවට පැමිණෙන සංචාරකයින්ට ලබා දෙන සී.ඩී පට සැකසීම සදහා සිංගප්පූරු සමාගමකට අවස්ථාව ලබාදීමේදී මුදල් වංචාවක් සිදුව අැති බවට තොරතුරු ලැබී අැති බවද ප්‍රකාශ කළේය.
මහනුවර ඇසල පෙරහර භාරය පනතේ වගන්තිවලට පටහැනිව යමින් මහාභාරකාරවරයාගේ හා පෙරහර මණ්ඩලයේ අවසරයකින් තොරව සමාගම් 25 කින් මුදල් එක්රැස්කර තිබෙන බවත්, දියවඩන නිලමේවරයාගේ බලතල ඉක්මවා යමින් දළදා මාලිගාවට අයත් උඩගෙදර වත්ත ඉඩම කොටස් කර විකුණා තිබෙන බවත් එම පැමිණිල්ලේ සඳහන් වේ.විකිණීමෙන් ලැබුණු මුදල් පී.ඒන් ඩී කන්ට්‍රක්ෂන් නැමැති දියවඩන නිළමේවරයාගේ පෞද්ගලික ගිණුමකට බැර කර අැති බවද පැමිණිල්ලේ සදහන්ය.
දූෂණ විරෝධී පෙරමුණ වෙනුවෙන් පූජ්‍ය උලපනේ සුමංගල හිමි සහ ජාතික හෙළ උරුමයේ මාධ්‍ය ලේකම් නිශාන්ත ශ්‍රී වර්ණසිංහ, ශිරාල් ලක්තිලක යන මහත්වරු ඇතුළු පිරිසක් මෙම පැමිණිල්ල ඉදිරිපත් කළහ.
