තමා ඉවත්වන්නේ පෞද්ගලික හේතුවක් මත බව පවසන මුස්තාපා මහතා ජනාධිපතිවරයා, අගමැතිවරයා ප්‍රමුඛ වත්මන් ආණ්ඩුවට උපරිම සහය ලබා දෙන බවත් කියා සිටියේය.
එක් පවුලක් වටා බලය කේන්ද්‍රගතවීම වෙනුවට පැතුරුණු ප්‍රජාතන්ත්‍රවාදයක් සහිත පාලනයක් නිර්මාණය වී තිබෙන බැවින් එය ආරක්ෂා කිරීම තමාගේද වගකීමක් බව ඔහු කියා සිටියේය.
ෆයිසර් මුස්තාෆා ඉකුත් ජනාධිපතිවරණයේදී මහින්ද රාජපක්ෂ මහතාගේ ආණ්ඩුවෙන් ඉවත් වී පොදු අපේක්ෂක මෛත්‍රිපාල සිරිසේන මහතාට සහය පළ කළ අතර මෛත්‍රිපාල සිරිසේන මහතා ජනපතිවීමෙන් පසු ඔහුට සිවිල් ගුවන් සේවා රාජ්‍ය ඇමතිධූරය හිමිවිය.
කෙසේ වුවද තමන්ට පිරිනැමුණු අමාත්‍යංශයේ අංශ කිහිපයක්ම සිය විෂය පථයෙන් ඉවත් කර ඇති බවට මුස්තාෆා මහතා කලකිරීමෙන් සිටි බව මාධ්‍ය වාර්තා කළේය.
මෙම වාතාවරණය මත ඔහු පසුගියදා සිංගප්පූරුවේද සංචාරය කර නැවත දිවයිනට පැමිණි අතර නීතීඥ වෘත්තියේ කටයුතු කිරීමට අපේක්ෂා කරන බවද පැවසුවේය.
