ශ්‍රී ලංකාව වැනි රටකට මෙවැනි මුදලක් ජනමාධ්‍ය කටයුතු සඳහා වැය කිරීම ආර්ථිකයට බරක් බවත්, දේශීය හා විදේශීය මාධ්‍යවේදීන් සඳහා රාත්‍රී භෝජනය ඇතුළු සංග්‍රහ කටයුතු සඳහා රුපියල් දසලක්ෂ 10 ක් වැයකර ඇති බවත් කීය. ප්‍රශ්නය විමසූ අනුර කුමාර දිසානායක මහතා රුපියල් දසලක්ෂ 10 ක් වැයකර පැවැත්වූ සංග්‍රහයේ ආහාර මෙනුපත කුමක්දැයි විමසා සිටියේය.

මෙය ග්‍රහලෝකයක පැවැත්වූ සමුළුවක් දැයි විමසූ දිසානායක මහතා, මාධ්‍ය කටයුතු සඳහා යැයි කියමින් විශාල දූෂණයක් සිදුකර ඇති බව පෙනෙන බව කීය. භාණ්ඩාගාර ප්‍රතිපාදන මඟින් මෙම වියදම් දරා ඇති බව කී ඇමැතිවරයා මෙපමණ මුදලක් වැය කිරීම ජනතාව ප්‍රතික්ෂේප කර ඇති බව ද කීය.

මාධ්‍ය මධ්‍යස්ථානය ඉදිකිරීම හා පවත්වාගෙන යාම සඳහා රුපියල් දසලක්ෂ 82.8 ක් ද, විද්‍යුත් මාධ්‍ය ආයතන මඟින් සිදුකරනු ලැබූ ප්‍රචාරක වැඩසටහන් සඳහා රුපියල් දසලක්ෂ 181 ක් ද, ජනතාව දැනුවත් කිරීමේ ප්‍රචාරක වැඩසටහන් සඳහා රුපියල් දසලක්ෂ 144 ක් ද, කාර්යාල උපකරණ සඳහා රුපියල් දසලක්ෂ 5 ක් ද, ලාංඡනය නිර්මාණය කිරීම හා පුවත්පත් දැන්වීම් සඳහා දසලක්ෂ 4 ක් ද, චෝගම් ව්‍යාපෘති කාර්යාල නිලධාරීන්ට දීමනා සඳහා රුපියල් ලක්ෂ 2 ක් ද, නිලධාරී දීමනා සඳහා රුපියල් ලක්ෂ තුනහමාරක් ද වැය කර ඇති බව කරුණාතිලක මහතා අනාවරණය කළේය.

dinamina