දෙරට ආශ්‍රිතව ජාත්‍යන්තරව හා අභ්‍යන්තරිකව සිදුවූ යම් යම් වෙනස්කම් හේතුවෙන් දෙපාර්ශවය අතර සම්බන්ධතාවය මේ මොහොතේ වඩා වැදගත්වන බව චීනයේ විදේශ ඇමති වැන්ග් යී මහතා පසුගිය සිකුරාදා ශ්‍රී ලංකා විදේශ ඇමති මංගල සමරවීර මහතා හමුවූ අවස්ථාවේදී ප්‍රකාශ කර සිටියේය.
මෙම සාකච්ඡාවේදී වඩා වැදගත් කරුණක් වූ නමුත් මෙරට මාධ්‍යයෙන් මඟ හැරී ගිය කරුණක් වූයේ '21 වන සියවසේ අලුත් සේද මාවත'ක් නිර්මාණය කිරීමට චීනයෙන් ඉදිරිපත් වූ යෝජනාවය.
මේ යෝජනාව ගෙන එන්නේ ශ්‍රී ලංකාවේ වරාය සංවර්ධනය, සමුද්‍ර සම්පත් ආරක්ෂාව පරිසර සංරක්ෂණය මෙන්ම වෙරළාරක්ෂක කටයුතු පිළිබඳ චීන සහයෝගිතාව සමඟය.
මේ අවස්ථාවේ චීන විදේශ අමාත්‍ය වැන්ග් යී චීනය විසින් අනාගතයේ ද්විපාර්ශවික සබඳතා තවදුරටත් ශක්තිමත් කරගැනීමේ අරමුණින් සහ යටිතල පහසුකම් සංවර්ධනයට සහ කාර්මික සහයෝගිත්වය වෙනුවෙන් 21වැනි සියවසේ ඒකාබද්ධ මුහුදු සේද මාර්ගයක්(21st Century Maritime Silk Road) නිර්මාණය කිරීමට යෝජනා කරන ලදී.
එම අදහස සම්බන්ධයෙන් අදහස් දැක්වූ මංගල සමරවීර මහතා ප්‍රකශ කරේ මුහුදු සේද මාර්ගයක් නිර්මාණය කිරීම හරහා අතීතයේදී මෙන්ම ශ්‍රී ලාංකීය ජනතාවට ප්‍රතිලාභ රැසක් අත්විය හැකි බවයි. එසේම ශ්‍රී ලංකාව ආසියාවේ ආයෝජන කිරීමේ ප්‍රමුඛ ගමනාන්තයක් කිරීමට නව රජයේ බලාපොරොත්තු බව මංගල සමරවීර මහතා වැඩි දුරටත් ප්‍රකාශ කළේය.
කෙසේ නමුත් මේ නව සේද මාවත පිළිබඳ යෝජනාව වූ කළී චීනය ඉන්දියන් සාගරයේ නාවික යුධ බලය ශක්තිමත් කිරීම සඳහා ගෙන ගිය වැඩ සටහනේම(String of Pearls) අලුත් මුහුණුවර මිසක වෙනකක් නොවන බව ජාත්‍යන්තර දේශපාලන විචාරකයෝ සැක පහල කරති. හම්බන්තොට වරාය, කොළඹ වරාය නගරය(පොර්ට් සිටි) එම ව්‍යාපෘතියේ කොටස් බව මීට පෙර හෙළිව තිබිණි.
