මෛත්‍රී පාලනයක්- මතින් තොර රටක් යන තේමාව යටතේ මත්ද්‍රව්‍ය ශ්‍රී ලංකාවෙන් තුරන් කිරීමේ වැඩ පිළිවෙල පිළිබඳ දැනුවත් කිරීමේ වැඩසටහනක් ඊයේ (02දා) අන්තරායක ඖෂධ පාලක ජාතික මණ්ඩල පරිශ්‍රයේදී පැවැත්විණි. එහිදී අදහස් දැක්වූ අතුරලියේ රතන හිමියන් පැවසුවේ මත්ද්‍රව්‍ය විරෝධී අරගලයට සහය දෙමින් මත්ද්‍රව්‍ය ජාලයට සම්බන්ධ පුදගලයන් පිළිබඳ කරුණු හෙළිකිරීමට බලාපොරොත්තු වන බවයි.
එහිදී අදහස දැක්වූ අන්තරායක ඖෂධ පාලක ජාතික මණ්ඩල සභාපති වෛද්‍ය නිලංග සමරසිංහ මහතා පැවසුවේ පසුගිය ආණ්ඩුව පෙරලා නව ආණ්ඩුව පත් කරගත් විශාල ජනතාවකගේ බලාපොරොත්තුව මතින් තොර රටක් වන හෙයින් සහ මත්ද්‍රව්‍ය ප්‍රශ්නය රටේ ජාතික ගැටළුවක් දක්වා දුරදිග ගොස් ඇති නිසා එය තුරන් කිරීමට ඒ හා සම්බන්ධ ප්‍රධාන රාජ්‍ය ආයතනය ලෙස නිතිය ක්‍රියාත්මක කරන ආයතන හා එක්ව පියවර ගන්නා බවයි.
දිවයින පුර පොලිසිවල පිහිටුවා ඇති දුෂණ විරෝධී අංශයේ ප්‍රධානම ඉලක්කය බවට භයානක මත්ද්‍රව්‍ය නිවාරණය බවට පත් කිරීමට කටයුතු කරන බව බස්නාහිර පළාත් නියෝජ්‍ය පොලිස්පති පූජිත ජයසුන්දර මහතා මෙහිදී පැවැසුවේය. වැඩිදුරටත් අදහස දැක්වූ පුජිත ජයසුන්දර මහතා පැවසුවේ පොලිස් නිලධාරීන්ට තම බල ප්‍රදේශයෙන් පිටත බල ප්‍රදේශයකට වුවද ගොස් වැටලීම් සිදු කිරීමට අවස්ථාව සලසා ඇති බවයි.
මේ මාධ්‍ය හමුව සඳහා ආගමික නායකයින්, අමාත්‍යංශ ලේකම්වරු, පොලිස් නිලධාරීන් පිරිසක් සහභාගී විය.
