අගවිනිසුරු කේ. ශ්‍රී පවන් මහතා සහ ප්‍රියසාත් ඩෙප්, ඊවා වනසුන්දර යන ශ්‍රේෂ්ඨාධිකරණ විනිසුරු මඬුල්ල ඉදිරියෙහි මේ පෙත්සම ඊයේ කැඳවන ලදි. එහිදී ෙම් බව ප්‍රකාශ කරන ලදී. මේ පෙත්සම ඉකුත් මාර්තු මස 17 වැනිදා ශ්‍රේෂ්ඨාධිකරණයට ගොනු කිරීමෙන් පසුව එම පෙත්සමෙහි වගඋත්තරකරුවන්ට නොතිසි නිකුත් කරන ලෙස අධිකරණය පෙත්සම්කරුගේ නීතිඥවරයාට නියෝග කර තිබෙන බව මෙහිදී අවධානයට ලක්විය.
එහෙත් එම නියෝගය අනුව කටයුතු කිරීමට පෙත්සම්කරුගේ නීතිඥවරයා අපොහොසත් වී ඇති බව අවධානයට ලක් කළ ශ්‍රේෂ්ඨාධිකරණය එම නොතිසි ලබාදීමෙන් පසුව පෙත්සම නැවත කැඳවීමට තීරණය කළේය. ඒ අනුව පෙත්සම පිළිබඳ නොතිසි සතියක් තුළ දී වගඋත්තරකරුවන්ට ලබාදෙන ලෙස නියම විය.
අල්ලස් හෝ දූෂණ විමර්ශන කොමිසම, එහි සභාපති ඇතුළු සාමාජිකයන්, හිටපු නීතිපති මොහාන් පීරිස් මහතා මෙහි වගඋත්තරකරුවෝ වෙති. හිටපු නීතිපතිවරයකු සහ හිටපු කැබිනට් මණ්ඩල උපදේශකවරයකු වූ මොහාන් පීරිස් මහතා රුපියල් මිලියන 619ක බදු මුදලක් රජයට අහිමි කළ බවට චෝදනා කරමින් ගොනුකර ඇති පැමිණිල්ල කඩිනමින් විභාග කරන ලෙසට අල්ලස් හෝ දූෂණ විමර්ශන කොමිසමට නියෝග කරන ලෙස මෙම පෙත්සම මඟින් ඉල්ලා තිබිණි.
හිටපු සහකාර රේගු අධිකාරිවරයකු සහ නීතිඥ නාගානන්ද කොඩිතුවක්කු මහතා විසින් මෙම පෙත්සම ගොනුකර තිබේ. කොළඹ ඩොක්යාර්ඩ් සමාගම සමඟ සිදුකළ බෝට්ටු සම්බන්ධ ගනුදෙනුවකදී රජයට හිමිවිය යුතු රුපියල් මිලියන 619ක බදු මුදලක් අහිමි කිරීමට මොහාන් පීරිස් මහතා කටයුතු කළ බවට එම පැමිණිල්ලෙහි සඳහන් විය.
එම ගනුදෙනුව සම්බන්ධයෙන් ගොනුකර තිබූ නඩුවක් නීතිපතිවරයාව සිටියදී විවිධ හේතු දක්වමින් කල් දැමීමටත්, අගවිනිසුරු ලෙස කටයුතු කරද්දී එම නඩුව නිෂ්ප්‍රභ කිරීමටත් මොහාන් පීරිස් මහතා කටයුතු කළ බවට පැමිණිල්ලෙහි සඳහන් විය.නාගානන්ද කොඩිතුවක්කු සහ රවීන්ද්‍රනාත් දාබරේ යන නීතිවේදීහු පෙත්සම්කරුවන් වෙනුවෙන් පෙනී සිටියහ.
dinamina
