ඒ අනුව, හිටපු ජනාධිපති මහින්ද රාජපක්ෂ බලයට ගෙන ඒම වෙනුවෙන් පාර්ලිමේන්තුව තුළ සහ ඉන් පිටත ක්‍රියා කරන විකල්ප කණ්ඩායම වශයෙන් හඳුන්වා ගන්නා පිරිසක්, 19 වැනි ආණ්ඩුක්‍රම ව්‍යවස්ථා සංශෝධනය පරාජය කිරීම සඳහා කුමන්ත්‍රණකාරී ලෙස ව්‍යාකූලත්වයන් ගොඩනගන පිරිසක් සහ පාර්ලිමේන්තුව විසිරුවා හැරීම පමණක් අපේක්ෂාවෙන් ක්‍රියා කරන එක්සත් ජාතික පක්ෂය යන කණ්ඩායම් මේ අතර වන බව විශ්ලේෂකයන් පෙන්වා දෙයි.
මෙම යෝජනාව පාර්ලිමේන්තුවට ඉදිරිපත් කළ මුදල් ඇමති රවී කරුණානායක සහ අගමැති රනිල් වික්‍රමසිංහ යන එක්සත් ජාතික පක්ෂ නායකයින් පවා ඡන්දය විමසන අවස්ථාවේදී පාර්ලිමේන්තු සභා ගර්භයේ නොසිටීමෙන් එජාපය විසින් අනුගමනය කරන කුමන්ත්‍රණකාරී පිළිවෙත හෙළිවේ. එමෙන්ම විකල්ප කණ්ඩායම යැයි හඳුන්වා ගන්නා කුමන්ත්‍රණකාරී පිරිස මහින්ද රාජපක්ෂ බලයට පත් කිරීම සඳහා අන්ත ජාතිවාදය සහ ආගම්වාදය වැපිරීමට අමතරව වෙනත් ඕනෑම ක්‍රියාමාර්ගයක්ද ගනිමින් තම අරමුණු වෙනුවෙන් ක්‍රියා කරමින් සිටී.
මේ සියල්ලන්ගේම පොදු අරමුණක් වී තිබෙන්නේ 19 වැනි ව්‍යවස්ථා සංශෝධනය පාර්ලිමේන්තුවේදී සම්මත කිරීම වැලැක්වීමය. මේ වෙනුවෙන් එකිනෙකා තනි තනිව සහ අන්‍යයෝන්‍ය අවබෝධයෙන් යුතු සැලසුම් ගණනාවක් ක්‍රියාවට නගමින් ඇති බව හෙළිවෙමින් තිබේ. භාණ්ඩාගාර බැදුම්කර නිකුත් කිරීම පිළිබඳ යෝජනාව නැවත පාර්ලිමේන්තුවට ඉදිරිපත් කර සම්මතකර ගැනීමේ අවස්ථාව හිමි වී තිබේ. එහෙත් ඊයේ සිදු වූ පරාජය හරහා මේ වනවිට රටතුළ මතුවෙමින් තිබෙන දේශපාලන කුමන්ත්‍රණ ගණනාවක් පිළිබඳ ප්‍රකාශයට පත්වූ බව දේශපාලන විශ්ලේෂකයන්ගේ මතයයි.
