මේ අනුව ඔහු රටේ නීතිය කුමක්දැයි නොදන්නා බව පෙන්වා ඇති අතර තමා දැරූ ඒකාධිපති විධායක ජනාධිපති ධුරයෙන් තමන්ට හිතෙන හිතෙන දේ සිදු කළ හැකි බව ඔහු සිතා සිටි බවත් හෙළි කර තිබේ.
මේ ඔහුගේ මුග්ධ ප්‍රකාශයයි
'මට අල්ලස්‌ හා දුෂණ කොමිසමට එන්න කියලා තියෙන්නේ මොකද කියලා බැලුවා. බැලින්නම් රටේ ජනාධිපතිවරයා විදිහට සිටියදී තිස්‌ස අත්තනායක මහතාට කැබිනට් ඇමැතිකමක්‌ දීම තමයි චෝදනාව. රටේ ජනාධිපතිට කැබිනට් ඇමැතිකමක්‌ දෙන්න බැරිනම් ඒක අල්ලසක් කියලා හිතනවානම් මොකක්‌ද රටේ තත්ත්වය.'
හිටපු ජනාධිපතිවරයා මේ බැව් පැවසුවේ පෙරේදා (19 දා) හම්බෙගමුව පුරාණ රජමහා විහාරස්‌ථානයේදී පැවති බෝධිපූජා පිංකමකට සහභාගි වෙමිනි. එහිදී හිටපු ජනාධිපතිවරයා මෙසේ ද පැවසීය.
'මේ පළිගැනීම් මට නම් විහිළුවක්‌. රටේ ව්‍යවස්‌ථාව අනුව ජනාධිපති මැතිවරණය ඉවරවෙලා අනෙක්‌ කෙනා දිවුරුම් දෙනතුරු නායකයා ජනාධිපති. දැන් අපට බලන්න වෙලා තියෙන්නෙ ප්‍රශ්න කිරීම් පළිගැනීම් වැනි විහිළු.
මම ඉතිං බෝධි පූජාවේ බලයෙන් ඔවුන්ගේ හිත්වල තියෙන ක්‍රෝධය වෛරය නැති වේවා කියලා ප්‍රාර්ථනා කරනවා.'
වරද කරුවකුගෙන් ප්‍රශ්න කිරීමත් වරදක් නැතිනම් පළිගැනීමක් බව හිටපු ජනාධිපතිවරයා පවසන්නේ තමන්ව ප්‍රශ්න කිරීමට ලක්වන විටදීය.
එහෙත් ඔහුගේ පාලන සමය තුලදී චෝදනා ලක්වූවන්ට එරෙහිව නීතියේ පිළිසරණවත් ලබා ගැනීමට ඔහු අවස්ථාව ලබා දුන්නේ නැත. මුළු මහත් අධිකරණ පද්ධතියත් පොලිසියත් ඔහුගේ නියෝග මත ක්‍රියාත්මක වූවා හැර එම ආයතනවලට ස්වාධීනව කටයුතු කිරීමේ අවස්ථාවවත් හිමිකර දී තිබුණේ නැත.
එමෙන්ම ඔහුට එරෙහිව වචනයක කතා කිරීමට මෙරට කිසිවකුට අවසර තිබුණේ නැත. මාධවේදීන් පවා මරා දැමීමට අතුරුදහන් කිරීමට ලක් කෙරුණේය.
