එපමණක් නොව පසුගිය ජනවාරි 8 වැනිදා මේ රටේ ප්‍රජාතන්ත්‍රවාදය අනතුරට ලක්කළ රාජ්‍ය විරෝධී කුමන්ත්‍රණකරුවන් අත්අඩංගුවට ගන්නා තුරු එදින එනම් ජනවාරි 19 දින සිට කොළඹ නිදහස් චතුරශ්‍රයේදී මාරාන්තික උපවාසයක් ආරම්භ කරන බවද එම ලිපියෙන් ජනාධිපති සිරිසේන මහතාට දැනුම් දුන් බවද සෝමවංශ අමරසිංහ මහතා හෙළි කෙළේය.
තමා සත්‍ය ලෙසම ජනතා විමුක්ති පෙරමුණෙන් ඉවත් වූයේ ජනවාරි 19 වැනිදා බවත් එතැන් සිට අප්‍රේල් 16 දක්වා තමාට ගන්ධබ්බ අවධියක් ගෙවා දමන්නට සිදු වූ බවත් ජනාධිපතිවරයා ඇමැතූ ලිපිය තමා පක්ෂයේ සියලු සම්බන්ධකම් අත්හැර පෞද්ගලික නමින් භාරදුන් බවත් හෙතෙම පැවැසීය.
ප්‍රජාතන්ත්‍රවාදයට අද එල්ල වී තිබෙන අනතුර රටටත් ජනතාවටත් දිවි හිමියෙන් ආදරය කරන තමා බොහෝ කල් ඇතිව එනම් ආණ්ඩුවේ මුල් දින 10 තුළ දැක එදා එම පියවර ගත් බවද අමරසිංහ මහතා පැවැසීය.
ඉනික්බිතිව සිදුවූයේ කුමක්දැයි නුදුරේදීම ජනතාවට දන්වන බවත් තමා ජවිපෙන් ඉවත්වීම ගැන වැරැදි අර්ථකථන සපයන්නන්ගේ ක්‍රියා කලාපයෙන් ජනතාව නොමඟ යා හැකි බැවින් මේ ලිපිය එළි දක්වන බවත් සෝමවංශ අමරසිංහ මහතා පැවැසීය.
මෙය පළමු පියවර බවත් මේ සිදුවීම් පිටුපස ඇති සියලු තොරතුරු ඉදිරියේ මෙරට ජනතාවගේ දැන ගැනීම සඳහා දිගහරින බවත් සෝමවංශ අමරසිංහ මහතා වැඩිදුරටත් සඳහන් කෙළේය.
- mawbima
