ජාතික ආරක්ෂාව පිළිබඳ තමන්ගේ වගකීම සහ වගවීම පිළිබඳ සියලු දෙනා අවබෝධයෙන් කටයුතු කළ යුතු බවද හෙතෙම ප්‍රකාශ කළේය.
නව තාක්ෂණය සහ නව පර්යේෂණ තුළින් කෙරෙන සොයාගැනීම් සමග අපගේ රණවිරුවන්ගේ දැනුම වර්ධනය කිරීම සඳහා අවශ්‍ය පුහුණු අවස්ථා වැඩිදියුණු කිරීමට පසුගිය දිනවල තමා සිදුකළ විදේශ සංචාරවලදී සහ මෙරටට පැමිණි රාජ්‍ය නායකයන්ද කැමැත්ත පළකර තිබෙන බව ජනාධිපතිවරයා පැවසුවේය.
රටේ ජනතාව පීඩාවට පත්කළ රුදුරු ත්‍රස්තවාදය නිමකිරීමේ ඓතිහාසික කාර්යභාරය නිමකළ අපගේ විරෝධාර රණවිරුවන් අද මානව සමාජය වෙනුවෙන් ඉටුකරන පුළුල් මෙහෙවරද මෙහිදී ජනාධිපතිවයා ඇගයීමට ලක්කළේය.
එමෙන්ම නේපාලයේ විපතට පත් ජනතාව වෙනුවෙන් ඉතා කැපවීමෙන් යුතුව සහන සේවා කටයුතුවල නිරතව ලෝකයටම මානුෂිකත්වයේ ආදර්ශය ලබාදෙන අපගේ ආරක්ෂක හමුදාවන්ගේ කාර්යභාරයද පැසසුමට ලක් කළේය.
ආරක්ෂක රාජ්‍ය අමාත්‍ය රුවන් විජේවර්ධන, ආරක්ෂක අමාත්‍යාංශයේ ලේකම් බී.එම්.යූ.ඩී. බස්නායක, ත්‍රිවිධ හමුදාපතිවරුන් ඇතුළු ආරක්ෂක අංශ ජ්‍යෙෂ්ඨ නිලධාරීහු මේ අවස්ථාවට එක්ව සිටියහ.
