පාරිභෝගික අධිකාරි පනතේ විසිහය වැනි වගන්තියට අනුව ඕනෑම භාණ්ඩයක අලෙවි මිල සටහන් කිරීම අනිවාර්ය බවත් ඒ අනුව මෙම තීරණය ගත් බවත් පාරිභෝගික කටයුතු පිළිබඳ අධිකාරියේ සභාපති රූම් මර්ෂුක් මහතා පැවසීය.
මේ අනුව මිල සටහන් නොකළ මෝටර් රථ හා නිවාස අලෙවි මධ්‍යස්ථාන ඉදිරි දිනවලදී පරීක්ෂාවට ලක් කිරීමට කටයුතු කරන බව සභාපතිවරයා සඳහන් කළේය.
ඇතැම් තැරැව්කරුවන් විසින් නියමිත මිලට වඩා වැඩි මිලක් පෙන්වා අධික ලාභයක් ලැබිම නිසා ජනතාව අසීරුතාවට පත් වන බවද සභාපතිවරයා පැවසුවේය.
මෝටර් රථ අලෙවි මධ්‍යස්ථානවල මෝටර් රථ අලෙවි කිරීමට ප්‍රදර්ශනය කිරීමේදී එහි මිල සටහන් කර නොතිබිම නිසා තමන් අසීරුතාවට පත්වන බවට පාරිභෝගිකයන්ගෙන් අධිකාරියට පැමිණිලි ලැබි ඇත.
මුද්‍රිත මාධ්‍යවල මිල සටහන් කිරීම යම්තාක් දුරට ක්‍රියාත්මක වුවද විද්‍යුත් මාධ්‍යවල මිල සඳහන් කිරීම ඉතා අවම මට්ටමක පවතී.
කිසියම් භාණ්ඩයක් අලෙවි කිරීම පිළිබඳව පුවත්පත්, චිත්‍රපට, රූපවාහිනී, වීඩියෝ, ගුවන් විදුලිය, අන්තර්ජාලය හෝ වෙනත් මුද්‍රිත හා විද්‍යුත් මාධ්‍යවල පළ කරනු ලබන්නේ නම් එහි මිල සටහන් කිරීම අනිවාර්ය කරමින් 2011.01.07 වන දින පාරිභෝගික කටයුතු පිළිබඳ අධිකාරිය විසින් ගැසට් නිවේදනයක් ද නිකුත් කර තිබේ.
