ටිරාන් අලස් මහතා ප්‍රධානත්වය දරන ලද රාධා ආයතනයේ සිදුව ඇතැයි පැවසෙන මූල්‍ය අක්‍රමිකතා පිළිබඳව විමර්ශනය කරන පොලිස් විශේෂ පරීක්ෂණ ඒකකය ඒ සම්බන්ධයෙන් ඔහුට එරෙහිව නැඟී ඇති චෝදනා මතින් ඔහු අත්අඩංගුවට ගැනීමට පොලිස්පති එන්. කේ. ඉලංගකෝන් මහතාගේ උපදෙස් පතා ඇත. මෙහිදී පොලිස්පතිවරයා පවසා තිබුණේ ටිරාන් අලස් මන්ත්‍රීවරයා ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ඉදිරිපත් කැර ඇති බැවින් ඔහු අත්අඩංගුවට ගැනීම සම්බන්ධයෙන් නීතිපතිවරයාගෙන් කරුණු විමසා සිටිය යුතු බවයි.
ආණ්ඩුව දේශපාලන විරුද්ධවාදීන් දඩයම් කරන බව පවසමින් ඔහු අත්අඩංගුවට ගත හැකි හෙයින් එය වළකාලීමේ අටියෙන් ටිරාන් අලස් මන්ත්‍රීවරයා මේ මස මුලදී මූලික අයිතිවාසිකම් පෙත්සමක් ඉදිරිපත් කැර තිබිණ.
මේ පෙත්සම ලබන සතියේ විභාගයට ගන්නා බව ප්‍රකාශ කරන ශ්‍රේෂ්ඨාධිකරණය මේ සම්බන්ධයෙන් සියලු වගඋත්තරකරුවන්ට නොතිසි නිකුත් කැර ඇත. මන්ත්‍රීවරයා මූලික අයිතිවාසිකම් පෙත්සමක් ඉදිරිපත් කැර ඇති නමුදු ඔහු අත්අඩංගුවට ගැනීම සම්බන්ධයෙන් නීතිමය බාධාවක් නැති බව නීතිපතිවරයා පොලිස්පතිවරයාට පෙන්වාදී තිබිණ. එහෙත් මේ වන විට එම මූලික අයිතිවාසිකම් පෙත්සම පිළිබඳව ශ්‍රේෂ්ඨාධිකරණයෙන් පොලිස් දෙපාර්තමේන්තුවට නිවේදනයක් නිකුත් කැර ඇති බැවින් නීතිපතිවරයාගේ නියෝජිත නිලධාරීන් අලස් මහතා අත්අඩංගුවට නොගන්නා ලෙස පොලිසියට උපදෙස් දී තිබේ.
dinamina
