තවදුරටත් බලයේ රැඳී සිටීමට වත්මන් රජයට අවශ්‍යතාවක් නැතැයි පැවසූ අධිකරණ අමාත්‍යවරයා මේ මාසය ඇතුළත ජනාධිපතිවරයා පාර්ලිමේන්තුව විසුරුවා හැරීම ආණ්ඩුවට ස්ථිර බව සඳහන් කළේය.
එක්සත් ජනතා නිදහස් සන්ධානයට ජනාධිපතිවරණයට පෙර පාර්ලිමේන්තුවේ තුනෙන් දෙකක බහුතර බලයක් හිමිව තිබූ බවත් මේ වන විට එය ආසන 112ක් දක්වා පහත වැටී ඇති බවත් රාජපක්ෂ මහතා පැවසුවේය.
විශ්වාසභංග යෝජනාවට අස්සන් 112 ක් පමණක් ඇතුළත් වීම තුළින් තහවුරු වන්නේ එක්සත් ජනතා නිදහස් සන්ධානයට දැන් පාර්ලිමේන්තුවේ බහුතර බලය අහිමිව තිබීම බව ද අධිකරණ අමාත්‍යවරයා ප්‍රකාශ කළේය.
අග්‍රාමාත්‍ය රනිල් වික්‍රමසිංහ මහතාට එරෙහි විශ්වාසභංග යෝජනාව පසුගිය සිකුරාදා පාර්ලිමේන්තු මහලේකම්වරයාට බාර දුන් බවත් එයට සන්ධාන මන්ත්‍රීවරුන් 112ක් අස්සන් කළ බවත් එජනිස පාර්ලිමේන්තු මන්ත්‍රී මනුෂ නානායක්කාර මහතා මාධ්‍ය වෙත ප්‍රකාශ කොට තිබිණි. එය සිකුරාදා පස්වරුව වන විටම කථානායක චමල් රාජපක්ෂ මහතාට භාර දීමට කටයුතු යොදා තිබුණු බව සන්ධාන ප්‍රකාශකයෙක් කීය.
- සිළුමිණ
