විදේශ කටයුතු අමාත්‍යාංශයේ ඊයේ (10) පැවැති මාධ්‍ය හමුවකට එක්වෙමින් ඇය මේ බව ප්‍රකාශ කළාය.
විදේශයන්හි ක්‍රියාත්මක වන ඩයස්පෝරා සංවිධානවල සාමාජිකයන් හා මෙරට ජනතාව අතර අන්තර් සම්බන්ධතා වර්ධනය කිරීමේ අරමුණින් මෙම ඩයස්පෝරා සැණකෙළිය පැවැත්වීමට විදේශ කටයුතු අමාත්‍යවරයා බලා‍පොරොත්තු වන බවට කොලොන්නේ මහත්මිය සඳහන් කළාය.
දෙමළ ඩයස්පෝරා ඇතුලුව ලොව පුරා ක්‍රියාත්මක වන සියලුම ශ්‍රී ලාංකික ඩයස්පෝරා කණ්ඩායම් සමඟ ශ්‍රී ලංකා රජය සාකච්ඡා පවත්වන බවත් ඔවුන්ගෙන් රටේ සංවර්ධනයට අවශ්‍ය සහය ලබා ගන්නා බවත් ඇය මෙහිදී පැවැසුවාය.
මේ වන විටත් තහනම් සංවිධාන ලෙස නම් කර ඇති ගෝලීය දෙමළ සංසදය ඇතුළු සංවිධාන කිහිපයක්ම මෙම ඩයස්පෝරා සැණකෙළියට එක්වීමට සූදානමින් පසුවන බව විදෙස් ආරංචි මාර්ග සඳහන් කරයි.
එල්.ටී.ටී.ඊ. සංවිධානය සමග සමීප සබඳතා පැවැත්වූ සංවිධාන කිහිපයක්ම ඊයේ දිනයේදීම මේ සම්බන්ධව උනන්දු වන බවට සමාජ ජාලවල ප්‍රවෘත්ති පළ කර තිබිණි.
කෙසේ වෙතත් මෙරට තුළ සංහිඳියාව ඇති කරමින් ජනතාවගේ හදවත්වල ඇති ජාතිවාදී අදහස් ඉවත් කිරීමේ අරමුණෙන් මෙම සැණකෙළිය සංවිධානය කරන බව මහිෂිනී කොලොන්නේ මහත්මිය මාධ්‍ය හමුවේදී වැඩිදුරටත් ප්‍රකාශ කළාය.
