ජාතික බස් ගාස්තු ප්‍රතිපත්තියට අනුව ජූලි මාසයේදී වාර්ෂිකව සිදුවන බස් ගාස්තු සංශෝධනයට අනුව මෙම ගාස්තු වැඩි වීම සිදුකළ යුතු බවට බස් සංගම් ඉල්ලා සිටීමට සූදානම් බව වාර්තා වේ.

බස් ගාස්තු සංශෝධනය කිරීමේ දී කරුණු 12ක් සැලකිල්ලට ගන්නා බවත් අදාළ කරුණු 12 සැලකිල්ලට ගැනීමේදී ඉන්ධන මිල අඩු වුවද, ඉතිරි සාධක 11කට බලපාන භාණ්ඩ හා සේවා ගාස්තු පසුගිය වසරේ ජූලි මාසයේ සිට මේ වනවිට 200% කින් ඉහළ ගොස් තිබෙන බව සමස්ත ලංකා පෞද්ගලික බස් සමාගම් සම්මේලනයේ ප්‍රධාන ලේකම් අංජන ප්‍රියංජිත් මහතා සඳහන් කළේය.

මේ පිළිබඳව අදාළ බලධාරීන් දැම්නුවත් කර තිබෙන බවත්, අඩුම වශයෙන් ඒකාබද්ධ කාලසටහන් ක්‍රියාත්මක කර පෙරගෙවුම් කාඩ්පත හඳුන්වා දුන්නා නම් මෙවර ගාස්තු සංශෝධනයේදී ජනතාවට සහන ලබාදීම පිළිබඳව සලකා බැලීමට තිබූ බවත් ඔහු පවසා සිටියේය.

එහෙත් එවැන්නක් සිදුනොවීම නිසා ජූලි පළමුවැනිදා සිට අවම ගාස්තුව වශයෙන් පවතින රු. 8 ගාස්තුව රු.10 දක්වා ඉහළ දමා එතැන් පටන් 10% කින් බස් ගාස්තු ඉහළ යා යුතු බවද ප්‍රියංජිත් මහතා සඳහන් කළේය.

ජූලි පළමුවැනිදා සිට ක්‍රියාත්මක වියයුතු බස් ගාස්තු සංශෝධනය පිළිබඳව සාකච්ඡාවක් ලබාදෙන ලෙසට තම සංගමය ජාතික ගමනාගමන කොමිෂන් සභාවෙන් ඉල්ලීමක් කර තිබෙන බව ලංකා පෞද්ගලික බස් හිමියන්ගේ සංගමය සඳහන් කළේය.

මීට අමතරව ඉදිරියේදී සිදුවන බස් ගාස්තු සංශෝධනයේදී බස් හිමියන් බලාපොරොත්තු වන ගාස්තු ප්‍රමාණය අද (11දා) පැවැත්වෙන මාධ්‍ය සාකච්ඡාවකදී රටට හෙළිකරන බවද එම සංගමයේ සභාපති ගැමුණු විජේරත්න මහතා සඳහන් කළේය.
මේ අතර, අභ්‍යන්තර ප්‍රවාහන අමාත්‍යාංශ ආරංචි මාර්ග සඳහන් කරන්නේ ජාතික ප්‍රතිපත්තියට අනුව ජූලි පළමු වැනිදා සිට බස් ගාස්තුවේ කිසිදු වෙනසක් සිදුනොවන බවයි.

බස් ගාස්තු සංශෝධනය කිරීම පිළිබඳව පූර්ණ බලය පවතින ආයතනය වන ජාතික ගමනා ගමන කොමිසම් සභාව විසින් බස්ගාස්තු සංශෝධනය පිළිබඳ ජාතික ප්‍රතිපත්තියට අනුව සිදුකළ සොයාබැලීම් වලට අනුව කළ ගණනය කිරීම් වලදී ලබන ජූලි මාසය තුළ දී බස්ගාස්තු සංශෝධනයක් සිදු කිරීමට අවශ්‍යතාවක් නොවන බවට හෙළි වී ඇති බව ද එම අමාත්‍යාංශ ආරංචි මාර්ග සඳහන් කරයි.

ගෙවී ගිය වසරක කාලය තුළදී බස් ගාස්තු සංශෝධනය පිළිබඳව සලකා බලන සාධක 12 හි මිල ගණන්වලට අදාළ වන සමස්ත මිල වෙනස බස්ගාස්තු වැඩි කිරීම සඳහා ප්‍රමාණවත් නොවන බවද හෙළිවී ඇතැයි ද එම අමාත්‍යාංශ ආරංචි මාර්ග වැඩිදුරටත් සහන් කරයි.

අද