මෙම පරිගණක පාසල් විද්‍යාගාර සඳහා ලබාදීමට මිලදී ගෙන තිබුණි. අධ්‍යාපන ඇමතිවරයා පවසන පරිදි මෙම එක් පරිගණකයක් රුපියල් 40,000 සහ 50,000 අතර මිලකට ලබා ගැනීමේ හැකියාව තිබියදීත් රුපියල් 110,000ක් වැනි මුදලක් එක් පරිගණකයක් වෙනුවෙන් වැය කර ඇත.
එක් පාසලක් සඳහා පරිගණක 60 බැගින් ලබා දී ඇති බව පැවසේ. වෙළඳපොලේ අඩු මිලට පරිගණක මිලදී ගැනීමේ හැකියාව තිබියදීත් ඉතා වැඩි මිලට පරිගණක මිලදී ගැනීම ගැටළුවක් බව ඇමතිවරයාගේ අදහසයි. ඔහු පැවසූ පරිදි මෙම වැඩිපුර මුදල් කාගේ සාක්කුවට ගියේදැයි සෙවීමට පරීක්ෂණයක් ආරම්භ කිරීමට නියමිතයි.
එසේම තාක්ෂණික විෂය ඉගැන්වීමට සුදුසු ගුරුවරු බඳවා ගැනීමටත් පෙර පාසල් වෙත පරිගණක ලබාදී ඇති අතර මේ හේතුව නිසා මෙම බොහෝ පාසල්වල වෙනත් විෂයන් උගන්වන ගුරුවරු තාක්ෂණික විෂය ඉගැන්වීම සඳහා යොදවා ඇතැයි ඇමතිවරයා පවසයි. මේ වරද නිවැරදි කරගැනීම සඳහා තාක්ෂණික ගුරුවරු බඳවා ගැනීමට පියවර ගනිමින් සිටින බව ඇමතිවරයා වැඩිදුරටත් ප්‍රකාශ කළේය.
අකිල විරාජ් කාරියවසම් මේ පිළිබඳ පැවසුවේ එක්සත් ජනතා නිදහස් සන්ධාන කුරුණෑගල දිස්ත්‍රික් පාර්ලිමේන්තු මන්ත්‍රී ටී බී ඒකනායක රජයේ පාසල්වල තාක්ෂණික ගුරු හිඟය පිළිබඳ නැගූ ප්‍රශ්නයකට පිළිතුරු දෙමිණි.
