පසුගිය සතියේ සිට ක්රියාත්මක මේ නව පනත හේතුවෙන් එරට පුරවැසිභාවය ලබා සිටින ශ්රී ලාංකිකයන්ට තවදුරටත් රැඳී සිටීමේ අවධානමක් ඇතිව තිබෙන බව වාර්තා වෙයි.
නව පුරවැසි පනත හේතුවෙන් එරට පුරවැසිභාවය ලබා සිටින දෙවැනි පෙළේ පුරවැසියන්ට සෘජුවම බලපෑමක් එල්ල කරන අතර ත්රස්තවාදයෙන් තම මවුබිම ආරක්ෂා කර ගැනීම නව පනත ගෙන ඒමේ අරමුණ බව කැනේඩියානු ආගමන කටයුතු ඇමැති ක්රිස් ඇලෙක්සැන්ඩර් මහතා පවසයි.
මේ පනතට අනුව අලුතින් කැනඩා පුරවැසිභාවය ලබාගත් විදේශිකයන් සඳහා එරට උපත ලැබූවන්ට හිමිවන වරප්රසාද සියල්ල එලෙසින්ම හිමි නොවන බව පෙන්වා දෙන ඇමැතිවරයා තම රටේ යහපත වෙනුවෙන් මේ පියවර ගෙන තිබෙන බව ද කියාසිටී.
එක්තරා පුරවැසි පිරිසක් කොන් කිරීමෙන් මේ නව පුරවැසි පනත ඉදිරිපත්කර තිබෙන බවට පිරිසක් විරෝධතාවයේ නිරතව තිබෙන අතර කැනේඩියානුවන් ආරක්ෂා කිරීමේ අරමුණින් නව පනත ඉදිරිපත් කළ බවට රජය ප්රකාශකර තිබේ.
ශ්රී ලාංකිකයන්ට පමණක් නොව ඉන්දීයාව, පාකිස්ථානය, පිලිපීනය, ඔස්ට්රේලියාව, සිංගප්පූරුව, දකුණු අප්රිකාව, නවසිලන්තය ඇතුළුව ලෝකයේ විවිධ රටවලින් ගොස් කැනඩාවේ පුරවැසිභාවය ලබා සිටින සියලු ජාතීන්ට මේ නව පනත හේතුවෙන් තවදුරටත් රැදී සිටීමේ අවධානමක් ඇතිව තිබෙන බව ද වාර්තා වෙයි.
dinamina